وائس چانسلر پنجاب یونیورسٹی کی قیادت میں وفدکی چین کے کامیاب دورے کے بعد وطن واپسی

بدھ 30 جولائی 2025 22:34

لاہور (اُردو پوائنٹ اخبارتازہ ترین - این این آئی۔ 30 جولائی2025ء)پنجاب یونیورسٹی کا اعلیٰ سطحی وفد وائس چانسلر پروفیسر ڈاکٹر محمد علی کی قیادت میں چین کے کامیاب سرکاری دورے کے بعد وطن واپس پہنچ گیا۔ وفد میں ڈین فیکلٹی آف آرٹس پروفیسر ڈاکٹر محبوب حسین، ڈین جیو سائنسز پروفیسر ڈاکٹر ساجد رشید اور گورنر آفس کے سینئر افسران شامل تھے۔اس اہم دورے کے دوران وفد نے مختلف چینی جامعات اور تحقیقی اداروں سے تعلیمی، تحقیقی اور ثقافتی تعاون کے فروغ کے لیے متعدد یادداشتوں پر دستخط کیے۔

دورے کے ایک اہم حصے میں وفد نے آسیان ممالک کی بین الاقوامی کانفرنس میں پاکستان کی نمائندگی کرتے ہوئے دنیا کے مختلف ممالک سے آئے وفود سے مفید اور نتیجہ خیز ملاقاتیں کیں۔ یہ ملاقاتیں مستقبل میں پنجاب یونیورسٹی اور دیگر بین الاقوامی اداروں کے درمیان اشتراکِ عمل کو نئی جہتیں فراہم کریں گی۔

(جاری ہے)

کانفرنس میں چھ ممالک کے مندوبین نے شرکت کی جس میں پنجاب یونیورسٹی کے وفد نے تدریسی و تحقیقی سرگرمیوں پر تفصیلی بریفنگ دی۔

دورے کے دوران ایک نمایاں پیشرفت پنجاب یونیورسٹی کی فیکلٹی آف آرٹس اینڈ ہیومینیٹیز اور چین کی یونیورسٹی آف آنشن کی فیکلٹی آف آرٹس اینڈ ہیومینیٹیز کے درمیان باہمی تعاون کے معاہدے کی صورت میں سامنے آئی۔ اس دستخطی تقریب میں وائس چانسلر پنجاب یونیورسٹی پروفیسر ڈاکٹر محمد علی مہمانِ خصوصی شرکت کی۔ معاہدے کے تحت دونوں جامعات تعلیمی تبادلے، مشترکہ تحقیقی منصوبوں، اور ثقافتی ہم آہنگی کو فروغ دینے کے لیے مل کر کام کریں گی۔

دونوں فیکلٹیوں کے ڈینز نے اس معاہدے کو پاکستان اور چین کے درمیان تعلیمی و تحقیقی تعلقات کو مزید مستحکم بنانے کی جانب ایک مثبت قدم قرار دیا۔یہ تاریخی دورہ پاکستان کی اعلیٰ تعلیمی اداروں کی بین الاقوامی سطح پر موجودگی، ساکھ اور اثر و رسوخ میں اضافے کی ایک بڑی مثال ہے۔