26 نومبر احتجاج کیس، علیمہ خان عارف علوی،عمر ایوب،شبلی فراز،حماد اظہرسمیت پی ٹی آئی کے 41 رہنماؤں کے وارنٹ گرفتاری جاری

اسلام آباد(اردوپوائنٹ اخبار تازہ ترین۔31جولائی 2025)اسلام آباد کی انسداد دہشتگردی کی خصوصی عدالت نے 26 نومبر کے احتجاج کے مقدمے میں پاکستان تحریک انصاف کے رہنماؤں عارف علوی، قومی اسمبلی میں اپوزیشن لیڈر عمر ایوب، سینیٹ میں قائد حزب اختلاف شبلی فراز، اسد قیصر، فیصل جاوید، سلمان اکرم راجا سمیت 41 ملزمان کے وارنٹ گرفتاری جاری کر دئیے۔وارنٹ گرفتاری جاری ہونے والے رہنماؤں کی تعداد 50 ہوگئی،9 پی ٹی آئی رہنماؤں کے وارنٹ گرفتاری پہلے ہی جاری کئے جا چکے ہیں۔

پی ٹی آئی قیادت اور کارکنوں کے خلاف 26 نومبر احتجاج سے متعلق کیس کی سماعت جج ابوالحسنات ذوالقرنین نے کی۔عدالت نے تھانہ کراچی کمپنی میں درج مقدمہ نمبر 1193 میں پی ٹی آئی قیادت سمیت 41 رہنماوں کے وارنٹ گرفتاری جاری کئے۔

(جاری ہے)

عدالت نے، وزیراعلی خیبر پختونخوا علی امین گنڈاپور، عبدالقیوم نیازی، شبلی فراز، فیصل جاوید، سلمان اکرم راجا، رؤف حسن، مراد سعید، احمد نیازی، اسد قیصر، حماد اظہر، عاطف خان سمیت شعیب شاہین، اعظم خان سواتی، عمر ایوب، صاحبزاہ حامد رضا،بانی پی ٹی آئی کی بہن علیمہ خانم، شیخ وقاص اکرم، کنول شوزب، شاندانہ گلزار، شیرافضل مروت کے بھی وارنٹ گرفتاری جاری کئے۔

انسداد دہشت گردی عدالت کے جج ابوالحسنات ذوالقرنین نے ملزمان کے پیش نہ ہونے پر وارنٹ جاری جاری کئے، عدالت نے ملزمان کو فوری گرفتار کرکے پیش کرنے کا حکم دیا ہے۔ راولپنڈی ڈویژن میں 24 اور 26 نومبر کے 32 مقدمات درج ہیں جس میں بانی پی ٹی آئی کی اہلیہ بشریٰ بی بی تھانہ ٹیکسلا میں 26 نومبر کانسٹیبل قتل کیس میں بھی نامزد ہیں۔واضح رہے کہ سرگودھا کی عدالت نے 9مئی کو میانوالی میں ہونے والی ہنگامہ آرائی،توڑ پھوڑ اور گھیراؤ جلاؤ کیس میں پی ٹی آئی رہنماء احمدخان بھچر،عمر ایوب سمیت 51ملزمان کے وارنٹ گرفتارجاری کئے تھے۔

کوئی بھی ملزم عدالت میں پیش نہیں ہوا،ا ے ٹی سی عدالت میں مقدمات کی سماعت ہوئی تھی۔عدالت نے عدم پیشی پر پی ٹی آئی رہنما احمد خان بھچر، بلال اعجاز اور احمد چٹھہ سمیت دیگر ملزمان کے وارنٹ گرفتاری جاری کر دیئے تھے۔عدالت کے بار بار طلبی کے باوجود پیش نہ ہونے پر عمر ایوب کو اشتہاری قرار دینے کی کارروائی شروع کر دی گئی تھی۔ عدالت نے جوڈیشل کمپلیکس میانوالی کے مقدمہ میں 57 نامزد ملزمان کے وارنٹ گرفتاری جاری کئے تھے۔

عدالت نے 9 مئی کے دیگر 4 مقدمات کی سماعت کرتے ہوئے شہادتیں قلمبند کیں تھیں۔بعدازاں انسداد دہشت گردی عدالت نے مزید سماعت 29 جولائی تک ملتوی کرتے ہوئے طلبی کے نوٹس جاری کر دیئے تھے۔ جوڈیشل کمپلیکس میانوالی میں 9 مئی کو ہنگامہ آرائی کے مقدمہ میں 57 نامزد اور 150 نامعلوم ملزمان کیخلاف مقدمہ درج کیا گیا تھا۔