ْ پی ٹی آئی کا پارٹی رہنماؤں اور کارکنان کے خلاف حالیہ عدالتی فیصلے چیلنج کرنے کا اعلان

جمعرات 31 جولائی 2025 21:00

اسلام آباد (اُردو پوائنٹ اخبارتازہ ترین - این این آئی۔ 31 جولائی2025ء) پاکستان تحریک انصاف (پی ٹی آئی) نے پارٹی رہنماؤں اور کارکنان کے خلاف حالیہ عدالتی فیصلے چیلنج کرنے کا اعلان کیا ہے۔میڈیا سے گفتگو کرتے ہوئے چیئرمین پی ٹی آئی بیرسٹر گوہر نے کہا کہ ان فیصلوں سے جمہوریت ڈی ریل ہو جائیگی، چاہتے ہیں سسٹم چلے اور ایوان مضبوط ہو، ایوان میں واپس جانا ہے یا بائیکاٹ کرنا ہے اس کا فیصلہ بانی پی ٹی آئی کریں گے۔

بیرسٹر گوہر نے کہا کہ 3 دن میں تین سزائیں ہوئی اور 45 سال کی سزا سنائی گئی،بانی پی ٹی آئی پر پریشر کے لیے ان کی اہلیہ کو سزا سنائی گئی، قومی اسمبلی میں پارلیمانی لیڈر زرتاج گل کو سزا سنائی گئی، آج فیصل آباد اے ٹی سی کے فیصلے میں اپوزیشن لیڈر سینیٹ، قومی اسمبلی کو سزا ہوئی، ہم نے ان سب کے باوجود ریاست کے ساتھ چلنیکافیصلہ کیا۔

(جاری ہے)

آل پارٹیز کانفرنس سے خطاب میں بیرسٹرگوہر نے کہا کہ پاکستان تحریک انصاف آئندہ کا جمہوری اور عوامی لائحہ عمل بہت جلد دیگی، پی ٹی آئی ان تمام جمہوری الائنسزکا ساتھ دیگی جو آئین، قانون اور انصاف کی بات کریں گے، اپنیحق، اپنے لیڈر اور ظلم کے خلاف آواز اٹھانا ہر شہری کا جمہوری حق ہے،کسی جماعت کے کارکنوں نے اتنی قربانیاں نہیں دیں جتنی پی ٹی آئی کارکنوں نے دیں، کوئی سوچ بھی نہیں سکتا کہ پرامن ریلی پر گولیاں چلیں گی۔

چیئرمین پی ٹی آئی نے کہا کہ سیاسی جماعتوں کوفیصلہ کرناہوگا کہ پاکستان کا مستقبل جمہوریت ہے یا نہیں،کچھ لوگ ملک سے جمہوریت ختم کرنے کی کوشش کر رہے ہیں، عدلیہ کی آزادی او ر ایماندار نظام کے لیے ہماری جدوجہد جاری رہیگی، پارلیمنٹ میں صرف وہ لوگ آنے چاہئیں جو عوامی حمایت سے منتخب ہوں۔