نواز شریف ،وزیراعلی مریم نواز سے یو اے ای کے سفیر حماد عبید ابراہیم سالم الزعابی کی ملاقات

یو اے ای کے سفیر کا پرتپاک و پرخلوص استقبال کیا گیا ، دونوں ممالک کے مابین تعاون کو نئی بلندیوں تک لے جانے پر اتفاق برادرانہ باہمی تعلقات،اقتصادی شراکت داری، تعلیم، سائنس اور پائیدار ترقی میں دوطرفہ تعاون کو مزید وسعت دینے پر تفصیلی تبادلہ خیال دونوں ممالک کا رشتہ محض سفارتی نہیں بلکہ دلوں میں بسا بندھن ہے، باہمی رشتہ وقت اور حالات کی آزمائشوں میں ہمیشہ سرخرو رہا ‘نواز شریف وزیر اعلی مریم نواز شریف کی متحدہ عرب امارات کے سرمایہ کاروں، اداروں اور کاروباری برادری کو پنجاب میں سرمایہ کاری کے لیے دعوت

جمعہ 1 اگست 2025 14:20

لاہور (اُردو پوائنٹ اخبارتازہ ترین - این این آئی۔ 01 اگست2025ء) پاکستان مسلم لیگ (ن) کے صدر محمد نواز شریف اوروزیراعلی مریم نواز شریف سے متحدہ عرب امارات کے پاکستان میں سفیر حماد عبید ابراہیم سالم الزعابی نے ملاقات کی ۔ اس موقع پر نواز شریف اوروزیراعلی مریم نواز شریف نے یو اے ای کے سفیر کا پرتپاک و پرخلوص استقبال کیا۔ پاکستان مسلم لیگ (ن) کے صدر محمد نواز شریف اور وزیر اعلی مریم نواز شریف کا یو اے ای کی دور اندیش قیادت اور عوام کے لیے اہل پنجاب کی جانب سے نیک تمنائوں اور خیرسگالی کا پیغام پہنچایا ۔

ملاقات میں پاکستان اور یو اے ای کے مابین تعاون کو نئی بلندیوں تک لے جانے پر اتفاق کیا گیا جبکہ برادرانہ باہمی تعلقات،اقتصادی شراکت داری، تعلیم، سائنس اور پائیدار ترقی میں دوطرفہ تعاون کو مزید وسعت دینے پر تفصیلی تبادلہ خیال کیا گیا ۔

(جاری ہے)

صدر پاکستان مسلم لیگ (ن) محمد نواز شریف اورمریم نواز شریف نے صدر یواے ای شیخ محمد بن زاید النہیان کی قیادت کو خراج تحسین پیش کیا اور یو اے ای کی سائنسی ترقی، ماحول دوستی، اور جدید وژن کو سراہا ۔

نواز شریف نے گفتگو کرتے ہوئے کہا کہ پاکستان اور یو اے ای کا رشتہ محض سفارتی نہیں بلکہ دلوں میں بسا بندھن ہے، پاکستان اور یو اے ای کا باہمی رشتہ وقت اور حالات کی آزمائشوں میں ہمیشہ سرخرو رہا ہے۔وزیر اعلیٰ پنجاب مریم نواز شریف نے کہا کہ یو اے ای کے ساتھ تعلیم، تحقیق اور ماحولیات کے میدان میں اشتراک عمل کو مزید وسعت دینے کی خواہاں ہے، پاکستان اور یو اے ای کے درمیان سرکاری و سفارتی پاسپورٹ ہولڈرز کے لیے ویزا فری انٹری کی اجازت قابل تحسین ہے، پاک یو اے ای دوطرفہ تجارتی حجم میں اضافہ باعث مسرت ہے۔

انہوں نے کہا کہ پنجاب میں تعلیم، صحت، انفراسٹرکچر اور قابلِ تجدید توانائی کے شعبوں کو جدت کی راہ پر گامزن کر دیا۔ وزیر اعلی مریم نواز شریف نے متحدہ عرب امارات کے سرمایہ کاروں، اداروں اور کاروباری برادری کو پنجاب میں سرمایہ کاری کے لیے دعوت دیتے ہوئے کہا کہ پنجاب بزنس فرینڈلی انوئرمنٹ کے ساتھ سرمایہ کاری کے لیے بہترین انتخاب بن چکا ہے۔