بانی پی ٹی آئی نے کہا ہے اگلی تحریک 14 اگست کو ہے، علیمہ خان

بانی پی ٹی آئی نے کہا ہے کہ الیکشن میں عوام کا مینڈیٹ چوری کیا گیا، میڈیا کا گلا گھونٹ دیا گیا، عدلیہ کو حکومت کے تابع کر دیا گیا، گفتگو

ہفتہ 2 اگست 2025 21:59

بانی پی ٹی آئی نے کہا ہے اگلی تحریک 14 اگست کو ہے، علیمہ خان

راولپنڈی (اُردو پوائنٹ اخبارتازہ ترین - این این آئی۔ 02 اگست2025ء)بانی تحریکِ انصاف کی ہمشیرہ علیمہ خان نے کہاہے کہ بانی پی ٹی آئی نے کہا ہے کہ 5 اگست اہم ہے، 14 اگست بھی اہم ہے، اگلی تحریک 14 اگست کو ہے۔اڈیالہ جیل کے باہر میڈیا سے گفتگو کرتے ہوئے انہوں نے کہا کہ بانی پی ٹی آئی نے کہا ہے کہ الیکشن میں عوام کا مینڈیٹ چوری کیا گیا، میڈیا کا گلا گھونٹ دیا گیا، عدلیہ کو حکومت کے تابع کر دیا گیا۔

(جاری ہے)

علیمہ خان نے کہا کہ پیپلز پارٹی اور ن لیگ مشرف دور کی ق لیگ کا کردار ادا کر رہی ہیں، بانی پی ٹی آئی نے کہا ہے کہ افغانستان کے ساتھ دوریاں نہیں ہونی چاہئیں۔ انہوںنے کہاکہ بانی پی ٹی آئی نے کہا ہے کہ ارکان کو ناجائز طریقے سے نا اہل کیا گیا ہے، نا اہل ہونے والے ارکانِ اسمبلی کی سیٹوں پر پی ٹی آئی بائیکاٹ کرے گی۔علیمہ خان نے کہا ہے کہ بانی پی ٹی آئی کے بچوں نے نائیکوپ اور ویزے کے لیے درخواست دی ہے، حکومت چاہتی ہے کہ بانی پی ٹی آئی کے بچے پاکستان نہ آئیں۔تحریکِ انصاف کے بانی کی ہمشیرہ نے کہا کہ 5 اگست کو ہم اڈیالہ آئیں گے تب تک بانی پی ٹی آئی کے بچے آئے تو وہ بھی آئیں گے، بچوں نے ملاقات کی درخواست دی ہے، ان کو ملاقات کی اجازت دی جاتی ہے تو ٹھیک ہے۔