گورنر خیبر پختونخوا فیصل کریم کنڈی کی بنوں میں پولیس چوکی فتح خیل پر دہشتگردوں کے حملہ کی مذمت

اتوار 3 اگست 2025 14:20

پشاور (اُردو پوائنٹ اخبارتازہ ترین - اے پی پی۔ 03 اگست2025ء) گورنر خیبر پختونخوا فیصل کریم کنڈی نے بنوں میں پولیس چوکی فتح خیل پر دہشتگردوں کے حملہ کی مذمت کرتے ہوئے بھارتی حمایت یافتہ دہشتگردوں کو ہلاک کرنے پر پولیس کو خراج تحسین کیا ہے۔ گورنر خیبر پختونخوا نے پولیس کی بہادری اور جرات مندانہ اور پیشہ وارانہ فرائض کی تعریف کی اور دہشتگردوں کے حملہ میں پولیس اہلکار کی شہادت پر اظہار تعزیت کیا۔

(جاری ہے)

انہوں نے شہید پولیس اہلکار کے لواحقین سے دلی ہمدردی و تعزیت کا اظہار کرتے ہوئے شہید کے بلند درجات اور پسماندگان کیلئے صبر جمیل کی دعا کی۔ گورنر نے حملہ میں زخمی پولیس اہلکاروں کی جلد صحتیابی کیلئے بھی نیک خواہشات کا اظہار کیا۔ انہوں نے کہا کہ شہید پولیس اہلکار کی بہادری و قربانی کو سلام پیش کرتے ہیں، دہشتگردی کے خلاف جنگ میں پولیس نے بے تحاشا قربانیاں دی ہیں، صوبہ میں قیام امن کیلئے پولیس کی قربانیاں رائیگاں نہیں جائیں گی۔