پی ٹی آئی رہنمائوں کی شمولیت ، آئندہ وزیراعظم پیپلزپارٹی کا ہوگا‘ گورنرپنجاب

پیر 4 اگست 2025 19:57

لاہور (اُردو پوائنٹ اخبارتازہ ترین - این این آئی۔ 04 اگست2025ء)گورنر پنجاب سردار سلیم حیدر نے کہا ہے کہ پیپلز پارٹی کی مقبولیت کی وجہ سے لوگ بڑی تعداد میں اس میں شمولیت اختیار کر رہے ہیں، پاکستان پیپلز پارٹی پسے ہوئے طبقے کی جماعت ہے،پیپلز پارٹی کی قیادت نے ملک کی خاطر اپنی جانیں قربان کیں ہیں، آئندہ وزیر اعظم پیپلز پارٹی کا ہوگا۔ان خیالات کا اظہار انہوں نے تحریک انصاف راولپنڈی سٹی کے ڈپٹی انفارمیشن سیکرٹری ساجد قریشی سے ملاقات کے دوران کیا جنہوں نے تحریک انصاف کی15 رکنی عہدیداران کے ہمراہ ان سے ملاقات کی۔

ملاقات کے دوران تحریک انصاف کے وفد نے پیپلز پارٹی میں شامل ہونے کا اعلان کیا۔ گورنر پنجاب نے ساجد قریشی کا دیگر ارکان کے ہمراہ پیپلز پارٹی میں شمولیت پر خیرمقدم کیا ۔

(جاری ہے)

گورنر پنجاب سردار سلیم حیدر خان نے کہا کہ پاکستان پیپلز پارٹی عوامی پارٹی ہے اور ملک کی سب سے بڑی سیاسی قوت ہے۔انہوں نے کہا کہ پیپلز پارٹی کی مقبولیت کی وجہ سے لوگ بڑی تعداد میں اس میں شمولیت اختیار کررہے ہیں۔

گورنر پنجاب نے تحریک انصاف کے عہدیداران کا خیر مقدم کرتے ہوئے پیپلز پارٹی کے پرچم کا مفلر پہنایا اور کہا کہ ان کے آنے سے راولپنڈی میں پیپلز پارٹی مزید مضبوط ہوگی۔ گورنر پنجاب نے کہا کہ پیپلز پارٹی کی قیادت نے ملک کی خاطر اپنی جانیں قربان کیں ہیں۔انہوں نے کہا کہ آئندہ وزیر اعظم بھی پیپلز پارٹی کا ہوگا اوربلاول بھٹو وزیر اعظم بنیں گے۔

گورنر پنجاب نے کہا کہ پیپلز پارٹی پسے ہوئے طبقے کی جماعت ہے اور اس نے ہمیشہ غریب عوام کے لئے آواز بلند کی ہے ۔ انہوں نے مزید کہا کہ حکومت کو عوام کو بنیادی سہولتوں کی فراہمی بالخصوص صوبہ پنجاب کے دور دراز اور پسماندہ علاقوں میں تعلیم اور صحت کی سہولیات کی فراہمی کے لیے ٹھوس اقدامات اٹھانے کی ضرورت ہے۔ پیپلز پارٹی میں شامل ہونے والوں میں حامد عباسی،بابر محمود،جاوید اقبال،ڈاکٹر شکیل، علی رضا،امجد جاوید،جہانگیر خان ،حمذہ عباسی، بدر ستی، راجہ تنویر ،راجہ خالد ،راجہ حفیظ اور سردار ندیم شامل اس موقع پر سٹی صدر پی پی پی راجہ کامران اور پیپلز پارٹی سٹی قائدین اسد پرویز اور عرفان حیدر بھی موجود تھے۔