9 مئی کوزرتاج گل پر میرے گھر کوآگ لگانے کا کوئی الزام نہیں ہے

زرتاج گل پر الزام ہےکہ ان کے اکسانے پر لوگ وہاں حملہ آور ہوئے ہیں، 9مئی کو اکسانے میں پوری لیڈرشپ نامزد ہے۔ وفاقی مشیر رانا ثناء اللہ

ثنااللہ ناگرہ منگل 5 اگست 2025 22:03

9 مئی کوزرتاج گل پر میرے گھر کوآگ لگانے کا کوئی الزام نہیں ہے

اسلام آباد ( اردوپوائنٹ اخبار تازہ ترین۔ آئی پی اے ۔ 05 اگست 2025ء ) وفاقی مشیر سیاسی امور رانا ثناء اللہ نے کہا ہے کہ 9 مئی کوزرتاج گل پر میرے گھر کوآگ لگانے کا کوئی الزام نہیں ہے، زرتاج گل پر الزام ہے کہ ان کے اکسانے پرلوگ وہاں حملہ آور ہوئے ہیں، 9 مئی کو اکسانے میں پوری لیڈرشپ نامزد ہے۔ انہوں نے جیو نیوز کے پروگرام میں گفتگو کرتے ہوئے کہا کہ اگر کوئی قومی سطح کا واقعہ ہو، اس پر دو سال گزر جائیں لیکن پراسیکیوشن نہ ہو، وہ مذاق نہیں ہوگا؟ اگر 9مئی کو کچھ ہوا ہے تو پھر کہاں ہیں مقدمات؟ کہاں ہیں ثبوت، کہاں ہیں عدالتیں؟ کیوں کیس نہیں چل رہا؟ انگلینڈ ایسا واقعہ ہوا تو انہوں نے تین روز میں ملزمان کو سزائیں سنا دیں۔

کیا 9 مئی نہیں ہوا؟ اگر پی ٹی آئی کہتی ہے 9 مئی ہم نے نہیں کیا تو پھر کون لوگ تھے جس نے کیا ہے؟ 9 مئی کا واقعہ ہوا ہے، گھروں کو آگ لگی ہے، دفاعی تنصیبات پر حملے ہوئے ہیں، میانوالی ایئربیس میں لوگ گھسے، شہداء کی یادگاروں کو گرایا ، ڈنڈے ماریں، 9 مئی کا واقعہ ہوا ہے۔

(جاری ہے)

آج دیکھ لیں، پی ٹی آئی نے احتجاج کی کال دی، آج موجودہ لیڈرشپ میں کوئی بندہ پیچھے رہاجو احتجاج میں شامل نہیں تھا؟ اگرآج اڈیالہ جیل توڑی جاتی اور وہاں کوئی نقصان ہوجاتاتو کیا وہاں موجود لیڈرشپ ملزم نہ ٹھہرائی جاتی؟ اسی طرح 9 مئی کو بھی پی ٹی آئی کا بڑا واضح بیانیہ تھا کہ خان ہے تو پاکستان ہے، اگر خان کو گرفتار کیا تو یہ ہماری ریڈلائن ہے، احتجاج کریں گے، جس سمت میں احتجاج کیا سب کارکنان اسی سمت میں گئے ہیں۔

پھر آج جب سزائیں ہورہی ہیں تو کیسے کہتے ہیں ؟انہوں نے کہا کہ 9 مئی کو جن لوگوں نے میرے گھر کو آگ لگائی،جتنے مقدمات میں نامزد تھے، وہ میرے سامنے بیٹھیں ایک بھی نہیں کہے گا کہ ہم وہاں نہیں تھے؟زرتاج گل کے اوپر آگ لگانے کا الزام نہیں ہے، زرتاج گل پر الزام ہے کہ ان کے اکسانے پر لوگ وہاں حملہ آور ہوئے ہیں۔9 مئی کو اکسانے میں پوری لیڈرشپ نامزد ہے۔