کل جماعتی حریت کانفرنس کا ’’یومِ استحصالِ کشمیر‘‘ بھرپور انداز میں منانے پر حکومتِ پاکستان کو خراج تحسین

اسلام آباد (اُردو پوائنٹ اخبارتازہ ترین - اے پی پی۔ 06 اگست2025ء) کل جماعتی حریت کانفرنس (آزاد کشمیر و پاکستان شاخ) کے کنوینر غلام محمد صفی اور جملہ قیادت نے 5 اگست کو’’یومِ استحصالِ کشمیر‘‘ بھرپور انداز میں منانے پر حکومتِ پاکستان، پاکستانی عوام، اور دنیا بھر میں بسنے والے کشمیریوں و پاکستانیوں کی طرف سے بھرپور احتجاجی مظاہروں، ریلیوں اور سیمینارز کے انعقاد پر انہیں خراجِ تحسین پیش کرتے ہوئے کہا ہے کہ یہ مظاہرے اس بات کا ثبوت ہے کہ کشمیری قوم تنہا نہیں بلکہ مملکتِ خداداد پاکستان اور اس کے عوام ہر محاذ پر ان کی پشت پر کھڑے ہیں۔

یہاں جاری بیان میں حریت قیادت نے کہا کہ ان عوامی سرگرمیوں نے دنیا کو ایک بار پھر یہ واضح پیغام دیا ہے کہ 5 اگست 2019 کا بھارتی اقدام، جس کے تحت آرٹیکل 370 اور 35A کو منسوخ کر کے ریاست جموں و کشمیر کی خصوصی آئینی حیثیت ختم کی گئی، ایک غیر قانونی، غیر آئینی اور جابرانہ اقدام تھا جسے کشمیری قوم نے ہرگز قبول نہیں کیا۔

(جاری ہے)

حریت رہنماؤں نے کہا کہ بھارت اس وقت اپنی تمام تر ریاستی طاقت کو کشمیریوں کی جدوجہدِ آزادی کو کچلنے کے لیے استعمال کر رہا ہے۔

مقبوضہ کشمیر کو ایک فوجی قلعے میں تبدیل کر دیا گیا ہے جہاں دس لاکھ سے زائد مسلح بھارتی فوجی ہر گھر، گلی اور بستی میں خوف اور دہشت کی فضا قائم کیے ہوئے ہیں۔حریت رہنمائوں نے کہا کہ نوجوانوں کو ماورائے عدالت قتل اور جعلی انکاؤنٹرز میں شہید کیا جا رہا ہے،سیاسی قیادت کو غیر قانونی حراست میں رکھا گیا ہے۔خواتین کی حرمتیں پامال ہو رہی ہیں،مقامی آبادی کا تناسب تبدیل کرنے کے لیے غیر ریاستی باشندوں کو بسانے کا سلسلہ تیز کر دیا گیا ہے۔

زمینوں کی زبردستی ضبطی، تعلیمی اداروں کی بے دخلی، اور معاشی بائیکاٹ معمول بن چکا ہے،حریت قیادت نے ان مظالم کو اقوامِ متحدہ کے چارٹر، عالمی انسانی حقوق کے اعلامیوں، اور جنیوا کنونشنز کی کھلی خلاف ورزی قرار دیا۔کنوینر غلام محمد صفی نے کہا کہ پاکستان وہ واحد ملک ہے جو مسلسل مسئلہ کشمیر کو نہ صرف علاقائی بلکہ عالمی سطح پر بھی اجاگر کر رہا ہے۔

پاکستانی قیادت نے ہمیشہ کشمیریوں کی سیاسی، اخلاقی اور سفارتی حمایت کی ہے اور آج بھی کشمیریوں کے زخموں پر مرہم رکھنے والا سب سے مضبوط آواز ہے۔انہوں نے کہا کہ پاکستان کا یہ غیر متزلزل مؤقف دنیا کے سامنے بھارت کے جھوٹے بیانیے کو بے نقاب کرتا آ رہا ہے۔حریت رہنماؤں نے اقوامِ متحدہ، او آئی سی، یورپی یونین، انسانی حقوق کی عالمی تنظیموں، اور مہذب دنیا سے پرزور مطالبہ کیا کہ وہ مقبوضہ کشمیر میں جاری ریاستی جبر و استبداد کا سنجیدگی سے نوٹس لیں، اور کشمیری عوام کو ان کا حقِ خودارادیت دلانے کے لیے ٹھوس، مؤثر اور فوری اقدامات اٹھائیں۔

انہوں نے کہا کہ کشمیری قوم سات دہائیوں سے قربانیاں دے رہی ہے اور وہ اس وقت تک چین سے نہیں بیٹھے گی جب تک اقوامِ متحدہ کی قراردادوں کے مطابق انہیں اپنے مستقبل کا فیصلہ کرنے کا حق نہیں مل جاتا،ہماری تحریک ظلم، جبر اور دھوکہ دہی کے خلاف ایک پُرامن مزاحمت ہے۔انہوں نے کہا کہ ہم ہر قیمت پر اپنے حقِ خودارادیت کے لیے جدوجہد جاری رکھیں گے۔ وہ دن ضرور آئے گا جب ظلم کا اندھیرا چھٹے گا اور آزادی کا سورج وادی کشمیر میں طلوع ہوگا۔