ایبٹ آباد،پشاور یونیورسٹی کے زیر اہتمام پہلی بین الاقوامی کریمینالوجی کانفرنس کا آغاز

بدھ 6 اگست 2025 20:50

ایبٹ آباد (اُردو پوائنٹ اخبارتازہ ترین - اے پی پی۔ 06 اگست2025ء) پشاور یونیورسٹی کے زیر اہتمام پہلی بین الاقوامی کریمینالوجی کانفرنس کا آغاز ہو گیا،یونیورسٹی آف پشاور کے باڑہ گلی کیمپس میں پہلی بین الاقوامی کریمینالوجی کانفرنس کا باقاعدہ افتتاح بدھ کے روز ہوا،تقریب کے مہمان خصوصی چیف جسٹس پشاور ہائی کورٹ جسٹس سید محمد عتیق شاہ نے اپنے خطاب میں کہا کہ انصاف کی راہ میں سب سے بڑی رکاوٹ ناقص تفتیش ہے اور یہ نا انصافی معاشرے کے لیے زہر قاتل ہے،انہوں نے کہا کہ نا انصافی کہیں بھی ہو انصاف کے لیے ہر جگہ خطرہ ہے،انہوں نے انصاف کے عمل میں شفافیت اور احتساب پر زور دیا،چیئرمین شعبہ کریمینالوجی پشاور یونیورسٹی ڈاکٹر بشارت حسین نے استقبالیہ خطبہ میں پاکستان کے فوجداری انصاف کے نظام پر روشنی ڈالتے ہوئے نوآبادیاتی دور کے قوانین میں اصلاحات کی ضرورت پر زور دیا،تقریب کے دیگر مہمانوں میں پشاور یونیورسٹی کے پروفیسر ڈاکٹر سجاد احمد ڈین فیکلٹی آف منیجمنٹ سائنسز،پروفیسر ڈاکٹر محمد اقبال ڈین فیکلٹی آف نومیریکل سائنسز،پروفیسر ڈاکٹر جمیل چترالی ڈائریکٹر پیس اینڈ کنفلیکٹ سٹیڈیز،،ڈاکٹر ذاکراللہ جان سابقہ وائس چانسلر سٹی یونیورسٹی اور اختر علی ڈائریکٹر نیب شامل تھے جنہوں نے کریمینالوجی کانفرنس کے انعقاد کو تعلیمی اور عملی میدان کے درمیان خلا کو پُر کرنے کی اہم کوشش قرار دیا،تقریب کے اختتام پر مہمانانِ خصوصی کو اعزازی شیلڈز پیش کی گئی،تین روزہ کریمینالوجی سیمینار کا اختتامی سیشن جمعہ کے روز پشاور یونیورسٹی کے باڑہ گلی کیمپس میں منعقد ہوگا، اس موقع پر وزیراعلیٰ خیبر پختونخوا کے مشیر برائے اطلاعات و تعلقات عامہ بیرسٹر ڈاکٹر محمد علی سیف بحیثیت مہمان خصوصی شرکت کریں گے۔