اے پی پی فنڈز میں خوردبرد کا میگا سیکنڈل بے نقاب ہوا ہے

اس معاملے کو خود آگے بڑھائوں گا ، وفاقی وزیر اطلاعات و نشریات عطاء اللہ تارڑ کا سینیٹر سرمد علی کے سوال پر اظہار خیال

بدھ 6 اگست 2025 21:00

اے پی پی فنڈز میں خوردبرد کا میگا سیکنڈل بے نقاب ہوا ہے

اسلام آباد (اُردو پوائنٹ اخبارتازہ ترین - اے پی پی۔ 06 اگست2025ء) وفاقی وزیر اطلاعات و نشریات عطاء اللہ تارڑ نے کہا ہے کہ ایم ڈی محمد عاصم کھچی نے قومی خبررساں ادارے اے پی پی کے فنڈز میں خوردبرد کا میگا سیکنڈل بے نقاب کیا ہے، اس معاملے کو خود آگے بڑھائوں گا۔ وہ بدھ کوسینیٹ کی قائمہ کمیٹی اطلاعات و نشریات اجلاس میں سینیٹر سرمد علی کی جانب سے اٹھائے گئے سوال پر اظہار خیال کررہے تھے۔

قائمہ کمیٹی اجلاس کی صدارت سینیٹر علی ظفر نے کی۔ سینیٹر عرفان صدیقی،سینیٹر پرویز رشید، سینیٹرجان محمد بلیدی، سینیٹر سید وقارمہدی جبکہ سیکرٹری وزارت اطلاعات و نشریات عنبرین جان، ایڈیشنل سیکرٹری اشفاق خلیل کے علاوہ وزارت اطلاعات ونشریات کے دیگر حکام بھی اجلاس میں شریک تھے۔

(جاری ہے)

سینیٹر سرمد علی نے اجلاس کے دوران سوال اٹھایا کہ اے پی پی کے فنڈز میں خورد برد کا معاملہ سامنے آیا ہے، ای آر سی اور پی ایف فنڈ میں 1.23 ارب روپے کی خطیر رقم قومی خزانے سے خوردبرد کی گئی، یہ مالی بدعنوانی 6 سے زائد ملازمین کے ایک منظم نیٹ ورک کے ذریعے کئی سالوں (2019 تا 2024) تک جاری رہی۔

واضح شواہد، بشمول بینک سٹیٹمنٹس، آڈٹ رپورٹس اور دیگر مالیاتی دستاویزات کی موجودگی کے باوجود تقریبا ایک سال گزرنے کے بعد بھی ایف آئی اے نے اب تک ایف آئی آر درج نہیں کی جو اس اہم قومی نوعیت کے مقدمے میں تاخیر کو ظاہر کرتا ہے۔ سینیٹر سرمد علی کے سوال پر اظہار خیال کرتے ہوئے وفاقی وزیر اطلاعات و نشریات عطاء اللہ تارڑ نے کہا کہ ایم ڈی اے پی پی محمد عاصم کھچی نے اے پی پی فنڈز میں خوردبرد کے ایک میگا سیکنڈل کو بے نقاب کیا ہے ،اس معاملے کو میں خود آگے بڑھائوں گا۔

اجلاس کے بعد سینیٹر سید وقار مہدی نے صحافیوں سے گفتگو کرتے ہوئے کہا کہ اے پی پی فنڈز میں میگا کرپشن کا سامنے آنا تشویشناک ہے، ایوان کے اندر بھی یہ معاملہ اٹھائوں گا۔ انہوں نے کہا کہ اے پی پی میں کرپشن ثابت ہونے پر ایف آئی اے کی جانب سے مقدمے کا اندراج نہ کرنے پر حیرت ہے۔