وزیراطلاعات پنجاب عظمی بخاری کا خیبر پختونخوا اور سندھ میں سیلاب و بارشوں سے نقصانات پر افسوس کا اظہار

بدھ 20 اگست 2025 17:35

لاہور (اُردو پوائنٹ اخبارتازہ ترین - اے پی پی۔ 20 اگست2025ء) وزیر اطلاعات و ثقافت پنجاب عظمی بخاری نے خیبرپختونخوا اور سندھ میں حالیہ بارشوں اور سیلابی صورتحال پر گہرے دکھ اور افسوس کا اظہار کیا ہے۔بدھ کو جاری اپنے ایک بیان میں انہوں نے کہا کہ خیبرپختونخوا میں بارشوں کے نتیجے میں جانی و مالی نقصان اور کراچی میں نظامِ زندگی کے مفلوج ہونے پر پنجاب حکومت کو شدید تشویش ہے،پنجاب بطور بڑا بھائی مشکل کی اس گھڑی میں اپنے دونوں بھائیوں خیبرپختونخوا اور سندھ کے عوام کے ساتھ کھڑا ہے،وزیراعلی مریم نواز کی ہدایت پر صوبہ پنجاب ہر ممکن تعاون کیلئے تیار ہے۔

عظمی بخاری نے بتایا کہ وزیراعلی پنجاب مریم نواز نے خیبرپختونخوا کے وزیر اعلی علی امین گنڈاپور سے بذاتِ خود رابطہ کیا اور ہر ممکن تعاون کی پیشکش کی،یہ جذبہ اس بات کی عکاسی کرتا ہے کہ مریم نواز صرف پنجاب ہی نہیں بلکہ پوری قوم کی قیادت کرنے کی صلاحیت رکھتی ہیں۔

(جاری ہے)

وزیر اطلاعات نے کہا کہ اگر خیبرپختونخوا ہ یا سندھ حکومت کو کسی بھی قسم کی مدد یا معاونت درکار ہو تو پنجاب حکومت ہر سطح پر امداد کیلئے تیار ہے،پنجاب کا دل بڑا ہے اور ہمارا عزم ہے کہ ہم قومی یکجہتی اور بھائی چارے کو ہر حال میں مضبوط بنائیں گے۔انہوں نے مزید کہا کہ وزیر اعلی مریم نواز پاکستان کے سب سے بڑے قومی لیڈر کی بیٹی ہونے کے ناطے پوری قوم کو اپنا سمجھتی ہیں اور ہر مشکل میں سب کے ساتھ کھڑی ہوتی ہیں۔