روس سے تیل کی خریداری بند نہ کی تو مزید ٹیرف لگے گا

امریکی صدر کی روس سے تیل خریداری پر بھارت سمیت دیگر ممالک پر 500 فیصد ٹیرف عائد کرنے کی دھمکی

محمد علی بدھ 6 اگست 2025 21:07

روس سے تیل کی خریداری بند نہ کی تو مزید ٹیرف لگے گا

واشنگٹن (اُردو پوائنٹ اخبارتازہ ترین۔ 06 اگست2025ء) امریکی صدر کی روس سے تیل خریداری پر بھارت سمیت دیگر ممالک پر 500 فیصد ٹیرف عائد کرنے کی دھمکی۔ تفصیلات کے مطابق امریکی صدر ڈونلڈ ٹرمپ نے بھارت پر اضافی 25 فیصد ٹیرف عائد کرنے کے بعد کہا ہے کہ روس سے تیل کی خریداری بند نہ کی تو مزید ٹیرف لگے گا۔ روس سے تجارت کرنے اور تیل خریدنے والے ممالک پر 500 فیصد تک ٹیرف بھی عائد کر سکتے ہیں۔

واضح رہے کہ امریکی صدر ڈونلڈ ٹرمپ نے بھارت پر عائد 25 فیصد ٹیرف میں مزید 25 فیصد اضافہ کردیا۔ بھارت پر اب مجموعی امریکی ٹیرف پچاس فیصد ہوگیا۔ وائٹ ہاؤس سے جاری بیان میں کہا گیا ہے کہ امریکی صدر ٹرمپ نے بھارت کی جانب سے روس کے تیل کی خریداری جاری رکھنے پر مزید 25 فیصد ٹیرف عائد کیا ہے۔

(جاری ہے)

بیان میں کہا گیا ہے کہ ٹرمپ نے بھارت پر مزید 25 فیصد ٹیرف کے ایگزیکٹو آرڈر پر دستخط بھی کردیے۔

نیا اضافی ٹیرف 27 اگست سے نافذالعمل ہوگا۔ ٹرمپ نے اپنی پوسٹ میں بھارت کو دنیا کے سب سے زیادہ ٹیرف لگانے والے ممالک میں سے ایک قرار دیا اور کہا کہ بھارت نے غیر مالیاتی تجارتی رکاوٹیں بھی عائد کی ہوئی ہیں جو امریکی مفادات کے خلاف ہیں۔ صدر ٹرمپ نے بھارت پر روس سے دفاعی سازوسامان اور توانائی خریدنے پر بھی تشویش کا اظہار کیا اور کہا کہ بھارت روس کا سب سے بڑا توانائی خریدار ہے، جو عالمی پابندیوں کی خلاف ورزی ہے۔ انہوں نے واضح کیا کہ اس کے علاوہ بھارت پر ٹیرف کے ساتھ اضافی جرمانہ بھی عائد کیا جائے گا۔ امریکی میڈیا کے مطابق امریکی صدر نے روس سے تیل خریدنے والے ممالک پر مزید ٹیرف لگانے کی دھمکی بھی دی ہے۔