Live Updates

وفاقی وزیر قانون کی اپوزیشن کو ایک بار پھر مذاکرات کی دعوت

حکومت کا رویہ غیر جمہوری ہوتا جارہا ہے، چیئر مین پی ٹی آئی بیرسٹر گوہر

بدھ 6 اگست 2025 20:00

وفاقی وزیر قانون کی اپوزیشن کو ایک بار پھر مذاکرات کی دعوت

اسلام آباد (اُردو پوائنٹ اخبارتازہ ترین - این این آئی۔ 06 اگست2025ء)وفاقی وزیر قانون اعظم نذیر تارڑ نے اپوزیشن کو ایک بار پھر مذاکرات کی دعوت دیتے ہوئے پاکستان تحریک انصاف کو نااہلی کے خلاف عدالتوں سے رجوع کرنے کا مشورہ دے دیا۔بدھ کو قومی اسمبلی میں خطاب کرتے ہوئے وفاقی وزیر قانون نے کہا کہ اسمبلی چلانے، ماحول بہتر بنانے اور قانون سازی کے لیے اپوزیشن ہمارے ساتھ مل کر بیٹھے، اس سے عام آدمی اور سیاست دان، دونوں کا فائدہ ہوگا۔

اعظم نذیر تارڑ نے کہا کہ اس حوالے سے وزیراعظم کی ہدایات بھی ہیں، انہوں نے ایک بار پھر اپوزیشن کو مذاکرات کی دعوت دی۔انہوں نے نااہلی کے نوٹی فکیشن کے خلاف پی ٹی آئی کو عدالتوں میں جانے کا مشورہ بھی دیا۔اسمبلی میں خطاب کرتے ہوئے چیئرمین پاکستان تحریک انصاف بیرسٹر گوہر نے کہا ہے کہ پاکستان کے چاروں صوبوں اور اسلام آباد میں لوگوں نے بانی پی ٹی آئی عمران خان کے حق میں بھرپور احتجاج کیا، حکومت کا رویہ دن بدن غیر جمہوری ہوتا جارہا ہے۔

(جاری ہے)

قومی اسمبلی میں اظہار خیال کرتے ہوئے بیرسٹر گوہر خان نے کہا کہ ہمارے بزرگ سیاستدانوں کو جیل میں ڈال دیا گیا، پی ٹی آئی نے الیکشن میں 180 نشستیں جیتی تھیں۔انہوں نے کہا کہ ہمیں صرف 90 کے قریب نشستیں دی گئیں، اپوزیشن لیڈر قومی اسمبلی عمر ایوب، زرتاج گل اور جمشید دستی سمیت دیگر رہنماؤں کو نااہل کیا گیا، ہمارے اراکین کی نااہلی خلاف قانون اور خلاف آئین ہے۔

چیئرمین پی ٹی آئی نے کہا کہ الیکشن کمیشن کے پاس آئین کے مطابق اس طرح نااہلی کا اختیار نہیں، اس عمل میں آئین قانون اور سپریم کورٹ کے فیصلے کو بالائے طاق رکھا گیا۔بیرسٹر گوہر نے کہا کہ پاکستان تحریک انصاف کو دیوار سے لگایا گیا، ہماری آواز کو ہر جگہ دبایا گیا، انہوں نے واضح کیا کہ ہم نے 9 مئی کی ہمیشہ مذمت کی ہے، ہم چاہتے ہیں کہ ملک میں جمہوریت رواں دواں ہو لیکن انتقامی کارروائیاں عروج پر ہیں۔