چینی کا بحران بڑھ رہا ہے‘ شوگر مافیا کو لگام ڈالنا ہوگی، خواجہ سعد رفیق

دکاندار چینی نہیں بیچ رہے ان کا مؤقف ہے 190 روپے کلو خرید کر 173 روپے پر بیچنا ممکن نہیں؛ ن لیگی رہنماء کا بیان

ساجد علی جمعرات 7 اگست 2025 10:38

چینی کا بحران بڑھ رہا ہے‘ شوگر مافیا کو لگام ڈالنا ہوگی، خواجہ سعد ..

لاہور ( اُردو پوائنٹ اخبارتازہ ترین۔ 07 اگست 2025ء ) پاکستان مسلم لیگ ن کے سینئر رہنماء اور سابق وفاقی وزیر خواجہ سعد رفیق کا کہنا ہے کہ لاہور میں چینی کا بحران بڑھ رہا ہے۔ اس حوالے سے اپنے ایک بیان میں انہوں نے کہا کہ پرچون دکاندار چینی نہیں بیچ رہے، ضلعی انتظامیہ کے میجسٹریٹ بسا اوقات بغیر خریداری دکانداروں کے خلاف چالان کاٹ رہے ہیں، دکانداروں کا مؤقف ہے کہ 190 روپے کلو چینی خرید کر 173 روپے پر بیچنا ممکن نہیں چنانچہ انہوں نے چینی رکھنا بند کر دیی ہے، اس صورتحال میں شوگر مافیا کو لگام ڈالنا ہوگی اور انتظامیہ اس کا کوئی مستقل حل نکالے۔

بتایا گیا ہے کہ 2 روزہ وقفے کے بعد چینی کی ایکس مل اور تھوک قیمتوں میں دوبارہ اضافہ ہوگیا ہے جب کہ حکومتی کریک ڈاون سمیت دیگر اقدامات دھرے کے دھرے رہ گئے، چیئرمین ہول سیل گروسرز ایسوسی ایشن روف ابراہیم نے کہا کہ فی کلو ایکس مل چینی کی قیمت 165روپے سے بڑھ کر 172 تا 173روپے ہوگئی، فی کلو گرام چینی کی تھوک قیمت 170روپے سے بڑھ کر 176 تا 177روپے ہوچکی ہے، ریٹیل میں فی کلو چینی 190 سے 195روپے کے درمیان فروخت کی جارہی ہے، سخت مانیٹرنگ نہ کی گئی تو ریٹیل میں فی کلو چینی دوبارہ 200 روپے سے تجاوز کرسکتی ہے۔

(جاری ہے)

دوسری طرف وزیراعظم کے معاون خصوصی رانا احسان افضل نے چینی بحران پر انوکھی منطق پیش کی ہے کہ ملک میں چینی کے بحران کی وجہ کوئی سکینڈل نہیں بلکہ موسمیاتی تبدیلی ہے کیوں کہ موسمیاتی تبدیلیوں کی وجہ سے گنے کی فصل کم ہوئی جس سے چینی کا شارٹ فال ہوا، اس وقت ملک میں چینی کی قیمت 173 سے 185 روپے فی کلو تک ہے، گراں فروشوں کے خلاف کریک ڈاؤن سے چینی کی قیمت نیچی آئی، چینی کی ایکس مل قیمت 165 روپے فی کلو ہے، قیمتوں سے متعلق سخت مانیٹرنگ کی جارہی ہے جب کہ منافع خوری کرنے والوں کے خلاف سخت ایکشن ہوگا۔