کیش لیس معیشت کے کامیاب نفاذ کو ممکن بنانے کیلئے پیشرفت

31 اگست تک تمام ریٹیل آئوٹ لیٹس پر راست کیو آر کوڈ آویزاں کرنا لازمی قرار

جمعرات 7 اگست 2025 11:56

کیش لیس معیشت کے کامیاب نفاذ کو ممکن بنانے کیلئے پیشرفت

لاہور(اُردو پوائنٹ اخبارتازہ ترین - این این آئی۔ 07 اگست2025ء)حکومت نے کیش لیس معیشت کے کامیاب نفاذ کو ممکن بنانے کے لئے پیشرفت کرتے ہوئے تمام کاروباری مراکز کو 31 اگست 2025 تک راست کیو آر کوڈز حاصل کرنے اور نمایاں طور پر آویزاں کرنے کو یقینی بنانے کے احکامات جاری کر دئیے ۔آزاد جموں و کشمیر ،گلگت بلتستان سمیت چاروں صوبوں کے چیف سیکرٹریز ،کمشنر اسلام آباد سمیت ریگولیٹری اداروں اور متعلقہ محکموںکے ذمہ دار افسران کو جاری ان ہدایات سے باضابطہ آگاہ کر دیا گیا ہے ۔

حکومت کی جانب سے کہا گیا ہے کہ اسٹیٹ بینک آف پاکستان نے ملک بھر میں تمام ریٹیل اور کمرشل مراکز پر ڈیجیٹل ادائیگیوں کی سہولیات جیسے راست کیو آر کوڈ، پی او ایس اور سافٹ پی او ایس کی دستیابی کو یقینی بنانے کے لیے قومی حکمت عملی تیار کی ہے۔

(جاری ہے)

تمام چیف سیکرٹریز ، ریگولیٹری اداروں اور متعلقہ محکموں کے ذمہ دارافسران اپنی حدود میں موجود تمام کاروباری اداروں کو ڈیجیٹل ادائیگیوں کو قبول کرنے کا پابند بنائیں۔

ڈیجیٹل ادائیگیاں قبول نہ کرنے کی صورت میں جرمانوں سمیت سزائیں بھی تجویز کی گئی ہیں ۔۔اس اقدام کی نگرانی اور ہم آہنگی کے لیے وزیراعظم آفس نے ڈاکٹر شازیہ غنی اسپیشل پراجیکٹس اینڈ انیشیٹیوزکو فوکل پرسن نامزد کیا ہے۔ حکومت کی جانب سے کہا گیا ہے کہ کیو آر کوڈزکی موجودہ تعداد5 لاکھ سے بڑھا کر 20 لاکھ کی جائے،فعال مرچنٹس کم از کم ایک ڈیجیٹل ٹرانزیکشن فی ماہ لازمی کریں،موبائل/انٹرنیٹ ایپ اور ڈیجیٹل بینکنگ صارفین کی تعداد مالی سال 2026 تک 9.5 کروڑ سے بڑھا کر 12 کروڑ کی جائے، ڈیجیٹل ٹرانزیکشنز کی تعداد 7.5 ارب سے دوگنی کر کے 15 ارب کی جائے،ترسیلات زر مکمل طور پر ڈیجیٹل ذرائع کے ذریعے منتقل کی جائیں۔