مون سون بارشوں کے باعث مختلف حادثات میں 164 شہری جا ںبحق، 582شہری زخمی، 216 گھر متاثراور 121مویشی ہلاک ، ترجمان

جمعرات 7 اگست 2025 14:02

لاہور (اُردو پوائنٹ اخبارتازہ ترین - اے پی پی۔ 07 اگست2025ء) وزیر اعلی پنجاب کی ہدایات کے پیشِ نظر پی ڈی ایم اے پنجاب نے مون سون فلڈ کی صورتحال بارے فیکٹ شیٹ جاری کر دی ۔ ترجمان پی ڈی ایم اے کے مطابق رواں سال موسم مون سون بارشوں کے باعث مختلف حادثات میں 164 شہری جا ںبحق، 582شہری زخمی، 216 گھر متاثراور 121مویشی ہلاک ہوئے ہیں۔ ترجمان نے بتایاگزشتہ 24 گھنٹوں میں راولپنڈی 46، منگلا 34، منڈی بہاوالدین 33، ڈی جی خان 27، اٹک 20، جہلم 15، گجرانوالہ 09، سیالکوٹ 07، چکوال 5، حافظ آباد 3 اور لاہور، نارووال ، میانوالی میں 1 ملی میٹر تک بارش ریکارڈ کی گئی جبکہ آئندہ 24 گھنٹوں میں پنجاب کے بیشتر اضلاع میں بارشیں متوقع ہیں۔

ڈی جی پی ڈی ایم اے پنجاب عرفان علی کاٹھیا نے حفا ظتی اقدامات کے تحت انتظامیہ کو الرٹ رہنے کی ہدایات دی ہیں۔

(جاری ہے)

ڈی جی کے مطابق دریائے سندھ میں تربیلا، کالاباغ، چشمہ اور تونسہ کے مقام پر پانی کا بہاو نارمل سطح پر ہے۔ دریائے چناب، جہلم، راوی اور ستلج میں پانی کا بہاو نارمل سطح پر ہے جب کہ رودکوہیوں اور بڑے دریاوں سے ملحقہ ندی نالوں میں بھی پانی کا بہاو نارمل سطح پر ہے۔

تربیلا ڈیم 96 فیصد جبکہ منگلا ڈیم 62 فیصد بھر چکا ہے ،بھارتی ڈیمز میں پانی کی سطح 56 فیصد تک ہے۔ ڈی جی نے شہریوں سے گزارش کی ہے کہ موسم برسات میں احتیاطی تدابیر اختیار کریں۔ بچوں کا خیال رکھیں انہیں برساتی نالوں نشیبی علاقوں دریاوں اور نہروں میں ہرگز مت نہانے دیں۔ انہوں نے بتایا کہ وزیر اعلی پنجاب کی ہدایات کے پیشِ نظر متاثرہ فیملیز کو مالی معاونت فراہم کی جا رہی ہے۔