مقبوضہ جموں وکشمیر، انتظامیہ نے بھارتی یوم آزادی سے قبل پابندیاں مزید سخت کردیں

جمعرات 7 اگست 2025 14:55

جموں(اُردو پوائنٹ اخبارتازہ ترین - این این آئی۔ 07 اگست2025ء)بھارت کے غیر قانونی زیر قبضہ جموںوکشمیر میں نئی دلی کے مسلط کر دہ لیفٹیننٹ گورنر کے ماتحت انتظامیہ نے 15 اگست کو بھارت کے یوم آزادی سے قبل پابندیاں مزید سخت کر دی ہیں۔کشمیر میڈیا سروس کے مطابق انتظامیہ نے بھارتی پیرا ملٹری اور پولیس کو ہدایت کی ہے کہ وہ جموں خطے کے تمام اضلاع میں حفاظتی انتظامات سخت کریں۔

(جاری ہے)

فورسز کو کنٹرول لائن اور ورکنگ بائونڈی والے تمام علاقوںمیں رات کا گشت بڑھانے اور پوری طرح چوکس رہنے کا حکم دیا گیا ہے۔ پولیس کو شہری علاقوںمیں موجودتمام اہم تنصیبات کی نگرانی سخت کرنے کو کہاگیا ہے۔یاد رہے کہ کشمیری بھارت کے یوم آزادی کو یوم سیاہ کے طورپر مناتے ہیں ۔بھارت کا یوم آزادی کشمیریوں کیلئے مزید مشکلات لاتا ہے کیونکہ بھارتی فورسز نام نہاد سیکورٹی کے نام پر انکا جینا حرام کردیتی ہیں۔بھارت کشمیریوں کو انکا حق خود ارادیت دینے کے بجائے اپنے قومی دن ان پر مسلط کرنے کی کوشش کر تا ہے۔