Live Updates

فسادی گروہ نے 14 اگست کو بھی احتجاج کی کال دی، ان کو ملکی ترقی سب سے زیادہ چُبھتی ہے

بشریٰ بی بی کی مالی بےضابطگیوں کی نشاندہی کرنا عمران خان کی فیلڈ مارشل سے دشمنی کی وجہ بنا، اس مرتبہ جشن آزادی کا عنوان “حصولِ آزادی سے تحفظِ آزادی تک” رکھا گیا ہے۔ وزیراطلاعات پنجاب عظمیٰ بخاری

ثنااللہ ناگرہ جمعرات 7 اگست 2025 19:16

فسادی گروہ نے 14 اگست کو بھی احتجاج کی کال دی، ان کو ملکی ترقی سب سے زیادہ ..

لاہور (اُردو پوائنٹ اخبارتازہ ترین۔ 07 اگست 2025ء) وزیر اطلاعات و ثقافت پنجاب عظمیٰ بخاری نے ہفتہ اقلیت کاررواں کی اختتامی تقریب سے خطاب کرتے ہوئے کہا کہ پاکستان تمام ہمسایہ ممالک سمیت پوری دنیا سے خوشگوار اور دوستانہ تعلقات کا خواہاں ہے، مگر بھارت کا یاتریوں کو پاکستان نہ آنے دینا افسوسناک اور غیرذمہ دارانہ اقدام ہے۔ انہوں نے کہا کہ پنجاب حکومت نے یوم آزادی کو معرکہ حق کے بعد اس بار مزید بھرپور اور تاریخی انداز میں منانے کا فیصلہ کیا ہے۔

اس مرتبہ جشن آزادی کا عنوان “حصولِ آزادی سے تحفظِ آزادی تک” رکھا گیا ہے۔ چودہ اگست کی مرکزی تقریب حضوری باغ میں اور ایک بڑی تقریب ایکسپو سینٹر لاہور میں منعقد ہوگی، جبکہ کلچر ڈیپارٹمنٹ بارہ اگست کو خصوصی پروگرام کا آغاز کرے گا۔

(جاری ہے)

عظمیٰ بخاری نے کہا کہ آج مینار پاکستان کے سائے میں کھڑے ہو کر ہم یہ عہد کرتے ہیں کہ ہر مذہب اور ہر رنگ و نسل کے پاکستانی کو برابر کا درجہ ملے گا۔

پورا ہفتہ جھنڈے میں سفید رنگ کی نمائندگی کرنے والی اقلیتوں کے احترام اور شمولیت کے لیے مختص کیا گیا ہے۔ وزیر اعلیٰ پنجاب نے معاشرے کے ان طبقات کا ہاتھ تھاما ہے جنہیں برسوں نظرانداز کیا گیا۔انہوں نے کہا کہ عمران خان کو اداروں کو سیاست میں گھسیٹنے اور الزام تراشی کی پرانی عادت ہے۔ فیلڈ مارشل نے جب وزیر اعظم ہاؤس میں موجود بشریٰ بی بی کی سرگرمیوں کی نشاندہی کی تو عمران خان اسی دن سے موجودہ عسکری قیادت کے مخالف ہوگئے۔

ان کا وطیرہ ہے کہ جو بھی ملک و قوم کی بھلائی اور بہتری کے لیے کام کرے گا، خان صاحب کو اس سے مسئلہ ہوگا۔صوبائی وزیر نے کہا کہ فساد گروپ نے چودہ اگست پر احتجاج کی کال دے کر پھر ملک دشمنی کا ثبوت دیا ہے۔ اگر کسی نے جشن آزادی کے موقع پر کسی بھی طرح کی رکاوٹ ڈالنے کی کوشش کی تو قانون حرکت میں آئے گا اور ہر سازش ناکام ہوگی۔انہوں نے کہا کہ بھارت نے اپنی عوام کو دنیا میں تنہا کر دیا ہے۔

بھارتی اقدامات پر ہمیں بھارتی شہریوں سے افسوس ہے کہ ان کے نہ ہمسائے بچے ہیں نہ عالمی دوست۔ اس کے برعکس پاکستان نے سفارتی محاذ پر اہم کامیابیاں حاصل کی ہیں۔عظمیٰ بخاری نے کہا کہ اس ملک میں ایک فساد گروپ ہر موقع پر نفرت پھیلانے کی کوشش کرتا ہے۔ عالیہ حمزہ کی ٹائم لائن اٹھا کر دیکھ لیں سب حقیقت سامنے آ جائے گی۔ چودہ اگست کے دن نہ کسی کو راستہ بند کیا گیا اور نہ کسی کو روکا گیا، مگر یہ لوگ خود باہر نہیں نکلے اور محض فرماشی گرفتاریاں کرواتے رہے۔انہوں نے کہا کہ پنجاب حکومت چودہ اگست کو بھرپور طریقے سے منائے گی اور ہر پاکستانی کے دل میں محبت، بھائی چارے اور فخر کے جذبات کو زندہ کرے گی۔