سندھ حکومت اپنی بدعنوانیوں پر وقتا فوقتا عالمی اسناد بٹورتی رہتی ہے، ایم کیو ایم پاکستان

اتنے برسوں میں جدید تو دور دستیاب سہولیات بھی کسی مقصد خاص کے تحت شہری علاقوں کے عوام سے چھین لی گئی ہیں،ترجمان

جمعہ 8 اگست 2025 20:11

کراچی (اُردو پوائنٹ اخبارتازہ ترین - این این آئی۔ 08 اگست2025ء)متحدہ قومی موومنٹ پاکستان نے کراچی میں سفری سہولیات کی کمی اور ناگفتہ بہ صورتحال پر عالمی بینک کی رپورٹ کو سندھ حکومت کے منہ پر طمانچے کے مترادف قرار دے دیا، مرکز بہادر آباد سے جاری کردہ بیان میں ترجمان ایم کیو ایم نے کہا کہ وقتا فوقتا سندھ حکومت اپنی بدعنوانیوں پر عالمی اسناد بٹورتی رہتی ہے جس پر دس روپے کے بارہ ترجمان ببانگِ دہل دوسروں کو مورد الزام ٹھہراتے نظر آتے ہیں اس بات سے قطع نظر کے ڈیڑھ دہائی سے زائد عرصے سے صوبہ سندھ میں پیپلز پارٹی کی بلاشرکت غیرے حکومت اور اٹھارویں ترمیم کے بعد تمام تر اختیارات پر یہی لوگ قابض ہیں، اتنے برسوں میں جدید تو دور دستیاب سہولیات بھی کسی مقصد خاص کے تحت شہری علاقوں کے عوام سے چھین لی گئی ہیں، متحدہ ترجمان کا کہنا تھا کہ ورلڈ بینک یا دوسرے کسی عالمی ادارے کی جانب سے ہونے والے ترقیاتی منصوبوں کو اپنے کاندھے کا تمغہ بنانا سندھ حکومت کا وطیرہ بن چکا ہے حکومتی سطح پر تعلیم تعمیر صحت روزگار اور سفری سہولیات کے منصوبے سوائے کاغذوں کے کہیں نظر نہیں آتے، ایم کیو ایم ترجمان نے مزید کہا کہ اِن متعصبانہ اطوار سے شہری علاقوں میں پکنے والے لاوے کا روکنا مستقبل میں سندھ حکومت اور اس کے حواریوں کے لئے ناممکن ہوگا۔