”اے آئی پی“ کا انجینئر رشید اور دیگر کی رہائی کیلئے احتجاجی مظاہرہ

ہفتہ 9 اگست 2025 16:02

سری نگر (اُردو پوائنٹ اخبارتازہ ترین - اے پی پی۔ 09 اگست2025ء) بھارت کے غیر قانونی زیر قبضہ جموں و کشمیر میں عوامی اتحاد پارٹی (اے آئی پی) کے رہنماﺅںاور کارکنوں نے پارٹی صدر انجینئر عبدالرشید اور دیگر کشمیری نظربندوں کی رہائی کیلئے سری نگر میں احتجاجی مظاہرہ کیا، انجینئر رشید جو بھارتی پارلیمنٹ کے رکن بھی ہیں، نئی دہلی کی بدنام تہاڑ جیل میں بند ہیں۔

(جاری ہے)

ہفتہ کو کشمیر میڈیا سروس کے مطابق مظاہرین نے پلے کارڈز اور بینرز اٹھا رکھے تھے جن پر ”رہا کرو، رہاکرو، انجینئر رشید کو رہا کرو“ جیسے نعرے درج تھے ۔ مظاہرین نے بھارتی جیلوں میں بند دیگر تمام سیاسی قیدیوں کی رہائی کا بھی مطالبہ کیا۔مقبوضہ جموںوکشمیر اسمبلی کے رکن خورشید احمد نے اس موقع پر انجینئر رشید کی مسلسل نظر بندی کی مذمت کرتے ہوئے کہا کہ انہیں جیل میں 7 سال ہو گئے ہیں۔ انہوں نے کہا کہ یہ احتجاج صرف انجینئر رشید کی رہائی کیلئے نہیں بلکہ جیلوں میں بند تمام کشمیری سیاسی قیدیوں کے لیے ہے۔انہوں نے مقبوضہ علاقے کی تمام سیاسی جماعتوں اور منتخب نمائندوں پر زور دیا کہ وہ کشمیری سیاسی قیدیوں کی رہائی کے لیے آواز اٹھائیں۔