بزنس کمیونٹی کے خلاف سخت اقدامات ختم کرانے پر حکومت اورفیڈمارشل کے مشکور ہیں،شبنم ظفر

حکومت کے ساتھ تقریباً تمام مسائل خوش اسلوبی سے حل کرانے پر یو بی جی اور ایف پی سی سی آئی کی قیادت پر فخر ہے

ہفتہ 9 اگست 2025 17:16

کراچی (اُردو پوائنٹ اخبارتازہ ترین - این این آئی۔ 09 اگست2025ء)ایف پی سی سی آئی کی سابق نائب صدر اورخیرپور چیمبر آف کامرس کی سرپرست اعلیٰ شبنم ظفر نے سابق نگران وفاقی وزیر برائے تجارت گوہر اعجاز، یو بی جی کے سرپرست اعلیٰ ایس ایم تنویر اور صدر ایف پی سی سی آئی عاطف اکرام شیخ کی جانب سے وزیرِاعظم میاں محمد شہباز شریف، فیلڈ مارشل سید عاصم منیر، وفاقی وزیرِ خزانہ و ریونیو محمد اورنگزیب، وزیرِاعظم کے معاونِ خصوصی برائے ریونیو ہارون اختر خان، وزیرِمملکت بلال اظہر کیانی اور دیگر اعلیٰ حکام کے سامنے وفاقی بجٹ2025-2026 میں بزنس کمیونٹی کے خلاف اعلان کردہ سخت اقدامات کو اٹھانے اور حکومت کی جانب سے ان سخت اقدامات کو ختم کرنے کے فیصلے پر اطمینان کا اظہار کیا ہے ۔

شبنم ظفر نے کہا کہ بجٹ میں متعدد ایسے ٹیکس انفورسمنٹ اقدامات شامل کیے گئے تھے کہ جو ملک کی کاروباری، صنعتی اور تجارتی سرگرمیوں کے لیے نہایت نقصان دہ تھے اور ان اقدامات نے کاروباری برادری میں خوف کی فضا پیدا کر دی تھی لیکن باضابطہ مشاورتی عمل کے ذریعہ سیلز ٹیکس ایکٹ کا سیکشن 37A، انکم ٹیکس ایکٹ کا سیکشن 21(S)، ای ۔

(جاری ہے)

انوائسنگ، سیلز ٹیکس ایکٹ کا سیکشن 8B اور سیکشن 40B سمیت دیگر اہم معاملات پر نہ صرف سیرحاصل بات چیت ہوئی بلکہ حکومت کے ساتھ تقریباً تمام مسائل اب خوش اسلوبی سے حل کرالئے گئے ہیں جس پر پاکستان بھر کی کاروباری برادری وزیراعظم پاکستان میاں شہبازشریف،فیلڈ مارشل سید عاصم منیر اور دیگر تمام متعلقہ وزراء اور اعلیٰ حکام کا شکریہ ادا کرتی ہے جنہوں نے بروقت اور ملکی مفاد میں مسائل حل کرائے اور مذاکرات کے نتیجے میں تمام متعلقہ نوٹسز اور سرکولر ایشو ہو چکے ہیں۔