چیئرمین سینیٹ کی مشیر مصباح کھر کا اسلام آباد میں اٹلی کے سفارتخانے کا دورہ،اٹلی کی سفیر مارلینا آرمیلن سے ملاقات

ہفتہ 9 اگست 2025 18:14

اسلام آباد (اُردو پوائنٹ اخبارتازہ ترین - این این آئی۔ 09 اگست2025ء)چیئرمین سینیٹ کی مشیر مصباح کھر نے اسلام آباد میں اٹلی کے سفارتخانے کا دورہ کیا اور پاکستان میں اٹلی کی سفیر مارلینا آرمیلن سے ملاقات کی۔ملاقات میں مصباح کھر نے سفیر کو انٹر پارلیمانی اسپیکرز کانفرنس کے قیام سے آگاہ کیا۔ انہوں نے بتایا کہ یہ ایک نیا کثیرالجہتی پارلیمانی فورم ہے جس کا مقصد دنیا بھر کی قومی پارلیمانوں کے مابین تعاون اور مکالمے کو فروغ دینا ہے۔

اب تک دنیا کے 45 ممالک کی قانون ساز اسمبلیوں کے سربراہان اس فورم میں شامل ہو چکے ہیں۔ حال ہی میں ملائیشیا میں ہونے والے اجلاس میں چیئرمین سینیٹ سید یوسف رضا گیلانی کو متفقہ طور پر آئی ایس سی کا پہلا صدر منتخب کیا گیا۔مشیر مصباح کھر نے اٹلی کی سینیٹ کی صدر ماریا ایلیسبیٹا البرٹی کیسیلٹی کو 11 اور 12 نومبر 2025ء کو اسلام آباد میں ہونے والے آئی ایس سی کے پہلے مکمل اجلاس میں شرکت کی باضابطہ دعوت دی۔

(جاری ہے)

انہوں نے اجلاس کے مرکزی موضوع "امن، استحکام اور سلامتی" پر روشنی ڈالتے ہوئے کہا کہ یہ پلیٹ فارم پارلیمانی رہنماؤں کو درپیش عالمی چیلنجز پر مشترکہ حکمتِ عملی وضع کرنے اور مؤثر مکالمے کو فروغ دینے کا موقع فراہم کرے گا۔ اس موقع پر اجلاس کی تیاریوں، موضوعاتی مباحثوں اور مختلف خطوں سے آنے والے وفود کے مابین اعلیٰ سطحی تبادلہ خیال کے منصوبوں سے بھی آگاہ کیا گیا۔

سفیر مارلینا آرمیلن نے اس اقدام کو خوش آئند قرار دیا اور پاکستان و اٹلی کے درمیان پارلیمانی و ادارہ جاتی تعلقات کے فروغ میں گہری دلچسپی ظاہر کی۔ملاقات کے اختتام پر دونوں طرف سے اس امید کا اظہار کیا کہ آئی ایس سی (ISC) میں اٹلی کی شمولیت نہ صرف بین الپارلیمانی تعاون کو مضبوط کرے گی بلکہ دونوں ممالک کی قانون ساز اسمبلیوں کے تعلقات کو بھی مزید مستحکم بنانے میں مدد گار ثابت ہوگی۔