معروف اداکار ایوب کھوسہ نے شوبز میں آنے کا دلچسپ قصہ سنا دیا

ہفتہ 9 اگست 2025 21:55

لاہور(اُردو پوائنٹ اخبارتازہ ترین - این این آئی۔ 09 اگست2025ء)پاکستان شوبز انڈسٹری کے سینئر اور معروف اداکار ایوب کھوسہ نے شوبز انڈسٹری میں آنے کا دلچسپ قصہ سنا دیا۔اداکار نے ایک نجی ٹی وی چینل کے مارننگ شو میں شرکت کی ،جہاں میزبان کی جانب سے سوال کیا گیا کہ آپ شوبز انڈسٹری میں کیسے آئی جس کے جواب میں سینئر اداکار نے مسکراتے ہوئے کہاکہ میں پی ٹی وی میں خوبصورت لڑکیوں کو دیکھنے کیلئے جایا کرتا تھا۔

(جاری ہے)

انہو ں نے کہا کہ وہاں پی ٹی وی کے جی ایم کریم بلوچ صاحب موجود تھے انہوں نے مجھ سے پوچھا یہاں کیسے آنا ہوا، تو میں نے جواب دیا کہ میں ٹی وی گھومنے آیا ہوں، اس پر کریم بلوچ صاحب نے کہاکہ تم صرف گھومنے آئے ہو یا کوئی ڈرامہ وغیرہ بھی کرنا چاہتے ہو، میں نے فوری ڈرامے کی خواہش ظاہر کردی، اور پھر بلوچی ڈراموں سے میرے کیرئیر کا آغاز ہوا۔

ایوب کھوسہ نے کہا کہ گھر والوں کے کوئی خاص تاثرات نہیں تھے، والد صاحب کو فکر تھی کہ میں بھٹک نہ جاں اور کہیں تعلیم کا سلسلہ رک نہ جائے، میں نے تعلیم مکمل کی لیکن اپنے والد کی خواہش پوری نہیں کرسکا۔انہوں نے کہاکہ میرے والد چاہتے تھے کہ میں بیوروکریٹ بن جاں لیکن میں آرٹ میں جانے کے بعد اس فیلڈ سے واپس نہیں آسکا اور آج تک اس فیلڈ میں موجود ہوں۔