مری میں 3 دن کیلئے دفعہ 144 نافذ کردی گئی، صرف فیملیز کو داخلے کی اجازت

ڈپٹی کمشنر مری آغا ظہیر عباس شیرازی کی جانب سے پابندی کا نوٹی فکیشن بھی جاری کردیا گیا

ساجد علی پیر 11 اگست 2025 11:29

مری میں 3 دن کیلئے دفعہ 144 نافذ کردی گئی، صرف فیملیز کو داخلے کی اجازت

مری ( اُردو پوائنٹ اخبارتازہ ترین۔ 11 اگست 2025ء ) یوم آزادی کی تقریبات کے دوران سکیورٹی خدشات کے باعث مری میں 3 دن کے لیے دفعہ 144 نافذ کرنے کے احکامات جاری کردیئے گئے، اس دوران صرف فیملیز کو تفریحی مقام میں داخلے کی اجازت ہوگی۔ تفصیلات کے مطابق انتظامیہ نے 14 اگست بھرپور انداز میں منانے کا فیصلہ کیا ہے، یوم آزادی کے موقع پر آتش بازی کا مظاہرہ ہوگا، مال روڈ پر سرکاری اور نجی عمارتوں کو برقی قمقموں سے سجادیا گیا ہے، تاہم یوم آزادی کی تقریبات کے دوران سکیورٹی خدشات کے باعث ڈپٹی کمشنر مری آغا ظہیر عباس شیرازی کی جانب سے 3 دن کے لیے دفعہ 144 کے نفاذ کا نوٹیفکیشن جاری کردیا گیا۔

مذکورہ نوٹیفکیشن میں کہا گیا ہے کہ یوم آزادی کی تقریبات کے موقع پر عوامی نظم و ضبط قائم رکھنے اور کسی بھی ناخوشگوار واقعے سے بچنے کے لیے 12، 13 اور 14 اگست 2025 کو مال روڈ اور جی پی او چوک پر صرف فیملیز کو داخلے کی اجازت دینے کا حکم جاری کیا گیا ہے۔

(جاری ہے)

انتظامیہ کا کہنا ہے کہ یہ فیصلہ 30 جولائی کو منعقدہ ڈسٹرکٹ انٹیلیجنس کمیٹی کی سفارش پر کیا گیا، جس میں یومِ آزادی کی تقریبات کے دوران ممکنہ ہجوم اور بد نظمی کو مدنظر رکھا گیا ہے، اس دوران دفعہ 144 نافذ العمل ہوگی اور خلاف ورزی کرنے والوں کے خلاف تعزیراتِ پاکستان کی دفعہ 188 کے تحت کارروائی کی جائے گی، پابندی کی مدت ختم ہونے کے بعد بھی اس دوران کی گئی خلاف ورزیوں پر کارروائی جاری رہے گی۔

علاوہ ازیں یوم آزادی اورمعرکہ حق کی تقریبات کے باعث مارگلہ ٹریلز بند کرنے کا فیصلہ کیا گیا ہے ضلعی انتظامیہ نے اس حوالے سے باقاعدہ نوٹیفکیشن بھی جاری کر دیا، نوٹیفکیشن سے معلوم ہوا ہے کہ 12 اور 13 اگست کی رات اسلام آباد کی چار ٹریلز شہریوں کے لیے بند رہیں گے، ٹریل 2، 3، 4 اور 5 عام شہریوں کے لیے مکمل طور پر بند رکھے جائیں گے، ٹریلز کو بند کرنے کا فیصلہ سکیورٹی خدشات کے پیش نظر کیا گیا۔