گورنر خیبرپختونخوا کی مردان آمد، آزادی پاکستان سولر ایکسپو کا افتتاح کیا

پیر 11 اگست 2025 17:36

پشاور (اُردو پوائنٹ اخبارتازہ ترین - اے پی پی۔ 11 اگست2025ء) گورنر خیبرپختونخوا فیصل کریم کنڈی نے مردان میں آزادی پاکستان سولر ایکسپو کا افتتاح کر دیا۔ گورنر ہائوس پشاور کے تر جمان کے مطابق ایکسپو پہنچنے پر میئر مردان حمایت اللہ مایار، سابق صدر مردان چیمبر ظاہر شاہ اور مردان چیمبر آف کامرس کے قائم مقام صدر نعمان صراف نے گورنر کا استقبال کیا۔

گورنر خیبرپختونخوا نے ایکسپو میں لگائے گئے سولر پینل بنانے والی کمپنیوں اور سولر مصنوعات کے سٹالز کا معائنہ کی،ایکسپو میں 50 سے زیادہ قومی اور بین الاقوامی کمپنیوں کی جانب سے سٹالز لگائے گئے ۔تقریب سے خطاب کرتے ہوئے گورنر نے کہا کہ موجودہ بجلی بحران کی صورتحال میں شمسی توانائی کی اہمیت بڑھ گئی ہے، صوبے میں رہائشی عمارتیں اور صنعتی یونٹس شمسی توانائی پر منتقل ہو رہے ہیں۔

(جاری ہے)

انہوں نے کہا کہ مردان کے 70 فیصد ماربل کے کارخانے سولرانرجی پر منتقل ہو چکے ہیں، توانائی کے متبادل ذرائع کا فروغ ایک بہترین کوشش ہے۔ فیصل کریم کنڈی نے کہا کہ آج کی نمائش کے انعقاد پر مردان چیمبر کی خدمات قابل ذکر ہیں،بجلی کی لوڈ شیڈنگ اور بھاری نرخوں نے انڈسٹری اور عوام کے مسائل بڑھا دئے ہیں۔ انہوں نے کہا کہ خیبرپختونخوا میں بجلی کی انتہائی پیداوار کے باوجود یہاں کے عوام اس سہولت سے محروم ہیں، انجینئرز رہائشی اور صنعتی شعبے کو سستی توانائی کے فروغ کے لیے نمایاں خدمات انجام دے رہے ہیں۔

ان کا کہنا تھا کہ گورنر کی حیثیت سے مختلف وفاقی وزارتوں اور اداروں سے رابطے میں رہتا ہوں، صوبے کے حالات میں بہتری لانے کے لیے کام کر رہے ہیں، یہاں کا امن تباہ کرنے والے عناصر سکیورٹی اداروں سے متعلق غلط پروپیگنڈا کر رہے ہیں،صوبے کے عوام امن دشمنوں کو کیفر کردار تک پہنچانے کے لیے اپنے اداروں کےساتھ کھڑے ہیں اور کھڑے رہیں گے۔\932