صوبہ میں رہائشی عمارتیں اور صنعتی یونٹس شمسی توانائی پر منتقل ہو رہے ہیں،فیصل کنڈی

صوبہ کا امن تباہ کرنے والے عناصر سیکورٹی اداروں سے متعلق غلط پروپیگنڈا کر رہے ہیں،گورنرخیبرپختونخوا

پیر 11 اگست 2025 22:25

پشاور(اُردو پوائنٹ اخبارتازہ ترین - این این آئی۔ 11 اگست2025ء) گورنر خیبر پختونخوا فیصل کریم کنڈی نے پیر کے روز ضلع مردان کا دورہ کیا اور وہاں آزادی پاکستان سولر ایکسپو کا بحیثیت مہمان خصوصی افتتاح کیا۔ ایکسپو پہنچنے پر مئیر مردان حمایت اللہ مایار، سابق صدر مردان چیمبر ظاہر شاہ اور مردان چیمبر آف کامرس کے قائمقام صدر نعمان صراف نے گورنر خیبرپختونخوا کا استقبال کیا۔

گورنر خیبرپختونخوا نے ایکسپو میں لگائے گئے سولر پینل بنانے والی کمپنیوں اور سولر مصنوعات کے اسٹالز کا معائینہ کیا، سولر ایکسپو میں 50 سے زیادہ قومی اور بین الاقوامی کمپنیوں کیجانب سے اسٹالز لگائے گئے۔ایکسپو میں چیمبر کے عہدیداروں، کاروباری برادری اور سولر پینل شعبہ سے وابستہ تاجروں نے شرکت کی۔

(جاری ہے)

ایکسپو سے خطاب کرتے ہوئے گورنر خیبرپختونخوا نے کہا کہ موجودہ بجلی بحران صورتحال میں شمسی توانائی کی اہمیت بڑھ گئی ہے، صوبہ میں رہائشی عمارتیں اور صنعتی یونٹس شمسی توانائی پر منتقل ہو رہے ہیں، انہوں نے کہا کہ مردان کے 70 فیصد ماربل کے کارخانے سولرانرجی پر منتقل ہو چکے ہیں، توانائی کے متبادل ذرائع کا فروغ ایک بہترین کوشش ہے، فیصل کریم کنڈی نے کہا کہ نمائش کے انعقاد پر مردان چیمبر کی خدمات قابل ذکر ہیں اور آزادی پاکستان سولر ایکسپو کے انعقاد پر مردان چیمبر آف کامرس کی کاوشوں کو سراہا.بجلی کی لوڈ شیڈنگ اور بھاری نرخوں نے انڈسٹری اور عوام کے مسائل بڑھا دئے ہیں، انہوں نے کہا کہ خیبرپختونخوا میں بجلی کی انتہائی پیداوار کے باوجود یہاں کے عوام اس سہولت سے محروم ہیں، انجینئرز رہائشی اور صنعتی شعبے کو سستی توانائی کے فروغ کے لیے نمایاں خدمات انجام دے رہے ہیں. انہوں نے کہا کہ حیثیت سے مختلف وفاقی وزارتوں اور اداروں سے رابطے میں رہتا ہوں، صوبے کے حالات میں بہتری لانے کے لئے کام کر رہے ہیں،انہوں نے کہا کہ صوبہ کا امن تباہ کرنے والے عناصر سیکورٹی اداروں سے متعلق غلط پروپیگنڈا کر رہے ہیں، صوبہ کے عوام امن دشمنوں کو کیفر کردار تک پہنچانے کے لیے اپنے اداروں کیساتھ کھڑے ہیں اور کھڑے رہیں گے۔