Live Updates

پنجاب‘ حالیہ بارشوں کے باعث دریاؤں میں طغیانی کا خدشہ، ممکنہ سیلاب کی وارننگ

بھارتی ڈیمز میں پانی کی سطح خطرناک حد تک بڑھ چکی، بھاکڑا ڈیم 61 ، پونگ ڈیم 76 ‘ تھین ڈیم 64 فیصد تک بھر چکے ‘پی ڈی ایم اے دریائے چناب میں مرالہ، خانکی اور قادر آباد کے مقامات پر درمیانے سے اونچے درجے کے سیلاب کی وارننگ جاری

منگل 12 اگست 2025 11:20

لاہور(اُردو پوائنٹ اخبارتازہ ترین - این این آئی۔ 12 اگست2025ء) پی ڈی ایم اے پنجاب نے خبردار کیا ہے کہ بالائی علاقوں میں حالیہ بارشوں کے باعث پنجاب کے مختلف دریاؤں میں طغیانی کا شدید خدشہ پیدا ہو گیا ہے۔ترجمان پی ڈی ایم اے کے مطابق بھارت کی جانب سے آئندہ دو روز میں دریائے ستلج میں پانی چھوڑے جانے کا امکان ہے جس سے سیلابی صورتحال پیدا ہو سکتی ہے۔

ترجمان کے مطابق بھارتی ڈیمز میں پانی کی سطح خطرناک حد تک بڑھ چکی ہے، بھاکڑا ڈیم 61 فیصد، پونگ ڈیم 76 فیصد جبکہ تھین ڈیم 64 فیصد تک بھر چکے ہیں، ان حالات میں دریائے ستلج میں پانی کا بہاؤ غیر معمولی طور پر بڑھنے کا اندیشہ ہے۔پی ڈی ایم اے، محکمہ آبپاشی اور ارسا مشترکہ طور پر 24 گھنٹے دریاؤں اور ڈیمز کی صورتحال کی نگرانی کر رہے ہیں۔

(جاری ہے)

ڈائریکٹر جنرل پی ڈی ایم اے عرفان علی کاٹھیا کے مطابق دریائے ستلج میں گنڈا سنگھ کے مقام پر پانی کی سطح عارضی طور پر معمول پر آ چکی ہے تاہم دریائے ستلج میں دوبارہ پانی کے بہاؤ میں اضافے کا خدشہ برقرار ہے۔

ڈی جی پی ڈی ایم اے نے مزید بتایا ہے کہ دریائے چناب میں مرالہ، خانکی اور قادر آباد کے مقامات پر درمیانے سے اونچے درجے کے سیلاب کی وارننگ جاری کر دی گئی ہے، عوام سے اپیل کی گئی ہے کہ وہ دریائی علاقوں میں احتیاط برتیں اور متعلقہ اداروں کی ہدایات پر عمل کریں۔