کراچی میں ڈکیتی مزاحمت پر شہری کو قتل کرکے فرار ہونیوالے ڈاکو کو شہریوں نے مار ڈالا

واردات کے بعد ملزمان نے فرار ہونے کی کوشش کی لیکن موقع پر موجود شہریوں نے پیچھا کرکے دو ڈاکوؤں کو پکڑلیا

ساجد علی منگل 12 اگست 2025 13:06

کراچی ( اُردو پوائنٹ اخبارتازہ ترین۔ 12 اگست 2025ء ) صوبہ سندھ کے دارالحکومت کراچی میں ڈکیتی مزاحمت پر شہری کو قتل کرکے فرار ہونیوالے ڈاکو کو شہریوں نے مار ڈالا۔ میڈیا رپورٹس کے مطابق شہر قائد کے علاقہ کورنگی میں ڈکیتی مزاحمت پر ایک شہری کو قتل کردیا گیا تاہم موقع پر موجود عوام نے ڈاکوؤں کو پکڑلیا اور شہریوں کے تشدد سے ایک ڈاکو ہلاک اور دوسرا زخمی ہوگیا۔

پولیس کا کہنا ہے کہ کورنگی ڈیڑھ نمبر میں ڈکیتی کی واردات کے دوران مزاحمت پر ملزمان کی فائرنگ سے ایک شہری جاں بحق ہوا، مقتول کی شناخت غلام محمد کے نام سے ہوئی جس کی دو ماہ بعد شادی ہونا طے تھی، ڈاکوؤں کی فائرنگ سے جاں بحق شہری کورنگی ڈیڑھ نمبرکارہائشی تھا اور 3 بھائیوں میں سب سے چھوٹا تھا، واقعے کے بعد مقتول کے گھر میں کہرام مچ گیا۔

(جاری ہے)

عینی شاہدین نے بتایا کہ واردات کے بعد ملزمان نے فرار ہونے کی کوشش کی لیکن موقع پر موجود شہریوں نے پیچھا کرکے دو ڈاکوؤں کو پکڑ لیا اور تشدد کا نشانہ بنایا جس کے نتیجے میں ایک ڈاکو موقع پر ہلاک اور دوسرا شدید زخمی ہوگیا جس کو پولیس نے حراست میں لے کر ہسپتال منتقل کردیا جب کہ تیسرا ڈاکو موقع سے فرار ہونے میں کامیاب ہوگیا، پولیس کی جانب سے واقعے کی تحقیقات شروع کردی گئیں۔

بتایا جارہا ہے کہ گذشتہ روز بھی کراچی میں ڈکیتی مزاحمت پر 4 بچوں کے باپ کو قتل کردیا گیا، ملزمان موٹرسائیکل پر سوار تھے جس پر پولیس کی نمبر پلیٹ لگی ہوئی تھی جب کہ مقتول کی شناخت جمیل کے نام سے ہوئی جو 4 بچوں کا باپ اور منی ایکسچینج کمپنی میں ملازم تھا، اہل خانہ کا کہنا تھا کہ جمیل نے حال ہی میں پلاٹ خریدا تھا اور اس کی ادائیگی کیلئے 45 لاکھ روپے لے کر آیا تھا، رقم دو تھیلوں میں رکھی گئی تھی جن میں سے ایک تھیلا جس میں 28 لاکھ روپے تھے وہ مقتول کی لاش کے نیچے دب گیا لیکن 17 لاکھ روپے والا تھیلا ملزمان لے کر فرار ہوگئے۔