اسپیکر قومی اسمبلی کی اپوزیشن کو حکومت کے ساتھ مذاکرات کی دعوت‘پل کا کرداراداکرنے کی پیشکش

منگل 12 اگست 2025 21:24

اسلام آباد(اُردو پوائنٹ اخبارتازہ ترین - آن لائن۔ 12 اگست2025ء)اسپیکر قومی اسمبلی سردار ایاز صادق نے منگل کے روز قومی اسمبلی کے اجلاس کے دوران اپوزیشن ارکان کو حکومت کے ساتھ مذاکرات کی باضابطہ دعوت دی اور بطور ''کسٹوڈین آف دی ہاؤس'' اپنے ہر ممکن تعاون کی یقین دہانی کرائی۔اسپیکر قومی اسمبلی کی جانب سے یہ ریمارکس اس وقت دیے گئے جب اپوزیشن رکن قومی اسمبلی اسد قیصر نے ایوان میں اپوزیشن ارکان کے استحقاق سے متعلق بات کی۔

اسپیکر نے کہا کہ پارلیمانی روایات، آئین، قانون اور قومی اسمبلی کے قواعد و ضوابط سب کے سامنے ہیں اور انہی کی پاسداری ہی جمہوری نظام کے استحکام کی ضمانت ہے۔اسپیکر سردار ایاز صادق نے بھارتی اپوزیشن لیڈر راہول گاندھی کی گرفتاری کا حوالہ دیتے ہوئے کہا کہ وہاں گرفتاری کے بعد بھی ''پروڈکشن آرڈرز'' جاری نہیں ہوئے۔

(جاری ہے)

انہوں نے واضح کیا کہ پارلیمانی سیاست میں مسائل کا حل صرف اور صرف مذاکرات سے ممکن ہے، اور اس مقصد کے لیے وہ حکومت اور اپوزیشن کے درمیان پل کا کردار ادا کرنے کے لیے تیار ہیں۔

انہوں نے کہا کہ ''گرینڈ جرگہ'' قومی اسمبلی اور سینیٹ سے بڑھ کر کوئی نہیں ہو سکتا، اس لیے تمام سیاسی قوتوں کو اس پارلیمان کو مضبوط بنانے کے لیے اپنا کردار ادا کرنا چاہیے۔ اسپیکر قومی اسمبلی نے زور دیا کہ اختلافِ رائے جمہوریت کا حسن ہے، لیکن اسے تعمیری مکالمے میں بدلنا ہی قومی مفاد میں ہے۔