فیصل آباد:جماعت اسلامی کا سعودی عرب سمیت 24 ممالک کی جیلوں15000سے زائد پاکستانی شہریوں کی قید ہونے کی اطلاعات پر تشویش کااظہار

منگل 12 اگست 2025 22:00

فیصل آباد (اُردو پوائنٹ اخبارتازہ ترین - آن لائن۔ 12 اگست2025ء)جماعت اسلامی کے ضلعی امیرپروفیسرمحبوب الزماںبٹ نے سعودی عرب سمیت 24ممالک کی جیلوں15000سے زائد پاکستانی شہریوں کی قید ہونے کی اطلاعات پر تشویش کااظہارکرتے ہوئے کہاہے کہ پاکستانی بے یار ومدد گار بندہیں۔وزیراعظم شہبازشریف ان ممالک سے پاکستانیوںکی رہائی ،ان سے برادرانہ سلوک اور مراعات کی بحالی کیلئے بات کریں۔

لاکھوں پاکستانی قیمتی زرمبادلہ کما کر ملک کی ترقی میںاہم کردار ادا کررہے ہیں۔انہوں نے کہا کہ لاکھوں پاکستانی سعودی عرب ،یو اے ای سمیت دنیابھر میں ان ممالک کی تعمیر وترقی کیلئے اہم کردارادا کر رہے ہیں۔ان ہزاروں محنت کشوں اور مزدوروں کو روزگار سے محروم کردیا گیا جن کے گھروں کے چولہے بجھ گئے اور وہ مسائل کا شکار ہو گئے اور ان کا کوئی پرسان حال نہیںہے۔

(جاری ہے)

انہوںنے کہاکہ حکومت کو غیر قانونی طور پر بیرون ملک جانے والوں کو روکنے کیلئے بھی ٹھوس اور موثر حکمت عملی اپنانا ہوگی کیونکہ غیر قانونی جانیوالے لوگ ہی زیادہ تر گرفتار ہوتے ہیں، حکومت کو مختلف ممالک میں گرفتار ان پاکستانیوں کی رھائی کیلئے خاطر خواہ انتظامات کرنے چاہیے تاکہ وہ جلد اپنے وطن واپس آ سکیں ۔پاکستانی سفارتی مشنوں کو بھی اپنے ہم وطنوں کیلئے زیادہ سے زیادہ آن لائن سسٹم کا اجرا کرنا چاہیے تاکہ وقت ضائع کیے بغیر ان کے مسائل حل ہو سکیں۔