وزیرمواصلات سے آذربائیجان کے سفیر خضر فرہادوف کی ملاقات

دونوں ممالک کے مابین حالیہ برسوں میں تعلقات کی مضبوطی ، باہمی تعاون میں نمایاں پیشرفت پر تبادلہ خیال آذربائیجان اور پاکستان یک جان دو قالب ،بھارت کیخلاف فتح کی خوشی آذربائیجان کے عوام کو ہوئی،عبدالعلیم خان

منگل 12 اگست 2025 22:47

اسلام آباد(اُردو پوائنٹ اخبارتازہ ترین - این این آئی۔ 12 اگست2025ء)وفاقی وزیر مواصلات عبدالعلیم خان نے کہا ہے کہ پاکستان اور آذربائیجان تاریخی، جغرافیائی اور مذہبی تعلق سے جڑے ہوئے ہیں، آذربائیجان اور پاکستان کے عوام یک جان دو قالب ہیں جس کا ثبوت یہ ہے کہ بھارت کے خلاف حالیہ معرکہ بنیان مرصوص میں پاکستان کی فتح کی زیادہ خوشی آذربائیجان کے عوام کو ہوئی۔

ان خیالات کا اظہار انہوں نے پاکستان میں آذربائیجان کے سفیر خضر فرہادوف سے گفتگو کرتے ہوئے کیا جنہوں نے یہاں منگل کوان کے دفتر میں ملاقات کی۔وزیر مواصلات عبدالعلیم خان نے کہا کہ دونوں ممالک کے مابین حالیہ برسوں میں تعلقات کی مضبوطی اور باہمی تعاون میں نمایاں پیشرفت ہوئی ہے،پاکستان اور آذربائیجان کا اسلام آباد میں مشترکہ چیمبر آف کامرس قائم ہونا انتہائی مثبت اور خوش آئند اقدام ہے جس سے دونوں ممالک کی بزنس کمیونٹی کے لئے آسانیاں پیدا ہوں گی۔

(جاری ہے)

وفاقی وزیر نے کہا کہ پاکستان وسط ایشیائی ریاستوں سے زمینی رابطوں،تجارت میں اضافے اور باہمی امور کے فروغ میں گہری دلچسپی رکھتا ہے۔انہوںنے کہاکہ پاکستانی نوجوانوں کی بڑی تعداد ان ریاستوں میں زیر تعلیم بھی ہے جبکہ استحکام پاکستان پارٹی کے حالیہ عوامی اجتماعات میں پاکستانی عوام کی طرف سے چین اور ترکیہ کے علاوہ آذربائیجان کے قومی پرچموں کو لہرانا دونوں ممالک کے عوام کے مابین دوستانہ تعلقات کا اظہار ہے۔

پاکستان میں آذربائیجان کے سفیر خضر فرہادوف نے کہاکہ دونوں ممالک کی دوستی آنے والے دنوں میں مزید فروغ پائے گی۔انہوںنے کہاکہ آذربائیجان بھی پاکستان سے دو طرفہ تجارت اور تعاون کے فروغ کا خواہاں ہے۔انہوں نے وفاقی وزیر مواصلات اور صدر استحکام پاکستان پارٹی عبدالعلیم خان کے حالیہ دورہ آذربائیجان کو سراہتے ہوئے اٴْن کی ذاتی دلچسپی اور کاوشوں کو سراہا جس سے دونوں ممالک مزید نزدیک آئے ہیں۔

Facebook Twitter Google + Share on Whatsapp

وزیرمواصلات سے آذربائیجان کے سفیر خضر فرہادوف کی ملاقات

متعلقہ عنوان :

مزید اہم خبریں