پی ڈی ایم اے نے بھارت کی جانب سے آئندہ 2 روز میں دریائے ستلج میں پانی چھوڑنے کی وارننگ جاری کردی

بھارتی ڈیموں میں پانی کی سطح میں غیرمعمولی اضافہ ہوا ہے، بھاکڑا ڈیم 61 پونگ ڈیم 76 اور تھین ڈیم 64 فیصد تک بھر چکے ہیں، بارشوں کے باعث بھی دریاؤں میں طغیانی کا خدشہ ہے۔ ڈی جی پی ڈی ایم اے

ثنااللہ ناگرہ منگل 12 اگست 2025 19:21

لاہور(اردوپوائنٹ اخبارتازہ ترین۔ انٹرنیشنل پریس ایجنسی۔ 12 اگست 2025 ) پی ڈی ایم اے نے بھارت کی جانب سے آئندہ 2 روز میں دریائے ستلج میں پانی چھوڑنے کی وارننگ جاری کردی ہے، بھارتی ڈیموں میں پانی کی سطح میں غیرمعمولی اضافہ ہوا ہے۔ تفصیلات کے مطابق پنجاب کے بالائی علاقوں میں بارشوں کے باعث دریاؤں میں طغیانی کا خدشہ ہے۔ بھارت کی جانب سے آئندہ 2 روز میں دریائے ستلج میں پانی چھوڑے جانے کا خدشہ ہے۔

بھارتی ڈیمز میں پانی کی سطح میں غیر معمولی اضافہ ریکارڈ کیا گیا ہے۔ بھاکڑا ڈیم 61 پونگ ڈیم 76 اور تھین ڈیم 64 فیصد تک بھر چکے ہیں۔ ڈائریکٹر جنرل پی ڈی ایم اے عرفان علی کاٹھیا کا کہنا تھا کہ پی ڈی ایم اے پنجاب ارسا اور محکمہ آبپاشی 24 گھنٹے دریاؤں و ڈیمز کی صورتحال کو مانیٹر کر رہے ہیں۔

(جاری ہے)

دریائے ستلج میں گنڈا سنگھ کے مقام پر سیلاب نچلے درجے سے معمول پر آ گیا ہے۔

دریائے ستلج کے بہاؤ میں مزید اضافے کا خدشہ ہے۔ دریائے چناب میں مرالہ خانکی اور قادر آباد کے مقام پر درمیانے سے اونچے درجے کے سیلاب کی وارننگ جاری کر دی گئی ہے۔ڈی جی پی ڈی ایم اے پنجاب نے کمشنرز ڈپٹی کمشنرز اور متعلقہ محکموں کو الرٹ رہنے کی ہدایات جاری کیں۔ ڈائریکٹر جنرل پی ڈی ایم اے عرفان علی کاٹھیا کا کہنا تھا کہ دریاؤں کے پاٹ میں موجود شہری فوری محفوظ مقامات پر منتقل ہو جائیں۔

ہنگامی انخلاء کی صورت میں انتظامیہ سے تعاون کریں۔ عوام الناس سے التماس ہے کہ احتیاطی تدابیر اختیار کریں۔ دریاؤں نہروں ندی نالوں اور تالابوں میں ہر گز مت نہائیں۔ سیلابی صورتحال میں دریاؤں کے اطراف پکنک اور غیر ضروری کراسنگ سے گریز کریں۔ بچوں کو دریاؤں ندی نالوں کے قریب ہرگز مت جانے دیں۔ ایمرجنسی کی صورتحال میں پی ڈی ایم اے پنجاب کی ہیلپ لائن 1129 پر رابطہ کریں۔

شہریوں کی جان و مال کا تحفظ پی ڈی ایم اے پنجاب کی زمہ داری ہے۔ آفات سے نمٹنے کے قومی ادارے ”این ڈی ایم اے“ کے اعداد و شمار کے مطابق بارشوں اور سیلاب سے 26 جون سے اب تک ملک میں 142 بچوں سمیت کم از کم 305 افراد موت کے منہ میں جا چکے ہیں جب کہ 700 سے زائد افراد زخمی بھی ہوئے محکمہ موسمیات کے اعداد و شمار کے مطابق پاکستان کے دو بڑے ڈیموں میں پانی سطح میں مسلسل اضافہ ہو رہا ہے تربیلا ڈیم میں 96 فیصد جبکہ منگل ڈیم 64 فیصد بھر چکا ہے۔