محسن نقوی کے دور میں پاکستان کرکٹ ٹیم ایک اور شرمناک شکست کے دہانے پر

ویسٹ انڈیز 34 سال بعد پاکستان کیخلاف سیریز جیتنے کی پوزیشن میں آ گئی، 295 رنز کے ہدف کے تعاقب میں پاکستان اور ٹاپ اور مڈل آرڈر ریت کی دیوار ثابت ہوا

محمد علی بدھ 13 اگست 2025 00:20

ٹرینیڈاڈ (اردو پوائنٹ تازہ ترین اخبار ۔ 12 اگست 2025ء ) محسن نقوی کے دور میں پاکستان کرکٹ ٹیم ایک اور شرمناک شکست کے دہانے پر، ویسٹ انڈیز 34 سال بعد پاکستان کیخلاف سیریز جیتنے کی پوزیشن میں آ گئی، 295 رنز کے ہدف کے تعاقب میں پاکستان اور ٹاپ اور مڈل آرڈر ریت کی دیوار ثابت ہوا، سیریز کے آخری ایک روزہ میچ میں ویسٹ انڈیز نے پاکستان کو 295 رنز کا مشکل ہدف دیا، پاکستانی گیند بازوں نے آخری 50 گیندوں پر 100 سے زائد رنز دے ڈالے، سیریز کے آخری میچ کا ٹاس پاکستان نے جیت کر پہلے فیلڈنگ کرنے کا فیصلہ کیا تھا، آج کے میچ کی فاتح ٹیم سیریز اپنے نام کر لے گی۔

پاکستان اور ویسٹ انڈیز کے درمیان تین میچوں کی سیریز ایک ایک سے برابر ہے، پہلے ون ڈے میں پاکستان، دوسرے میں ویسٹ انڈیز کامیاب ہوا۔

(جاری ہے)

پاکستانی وقت کے مطابق سیریز کا فیصلہ کن مقابلہ آج شام ساڑھے چھ بجے شروع ہوا۔ واضح رہے کہ پاکستان نے ویسٹ انڈیز کے خلاف گذشتہ31 سال میں دس ون ڈے انٹر نیشنل سیریز میں فتح حاصل کر رکھی ہے۔ یہ بھی واضح رہے کہ چئیرمین پی سی بی محسن نقوی کی جانب سے کرکٹ بورڈ میں آمد کے بعد سے پاکستان کی کرکٹ نے زوال کی نئی تاریخ رقم کر دی۔

محسن نقوی کے چئیرمین پی سی بی بننے کے بعد سے پاکستان کرکٹ ٹیم کی شرمناک شکستوں اور شرمناک ریکارڈز بننے کا سلسلہ رکنے کا نام نہیں لے رہا۔ سامنے آنے والے تازہ ترین اعداد و شمار کے مطابق 2024 سے اب تک کھیلے گئے بین الاقوامی ٹی ٹوئنٹی میچز میں پاکستان کرکٹ ٹیم کا دنیا میں سب سے بدترین ریکارڈ رہا ہے۔ پاکستان نے گزشتہ ایک سال کے دوران 63 ٹی ٹوئنٹی میچز کھیلے جن میں سے اسے 38 میں شکست ہوئی۔

گزشتہ ایک سال کے دوران کسی دوسری ٹیم کو اتنے ٹی ٹوئنٹی میچز میں شکست نہیں ہوئی۔ محسن نقوی دور میں پاکستان کرکٹ ٹیم کی شرمناک شکستوں کا ریکارڈ بن چکا ہے۔ محسن نقوی کے چئیرمین پی سی بی بننے کے بعد پاکستان ٹی ٹوئنٹی ورلڈکپ میں امریکا سے شکست کھا چکا، آئرلینڈ کے ہاتھوں بھی پاکستان کو شکست ہو چکی، پاکستان ہوم گراونڈ پر کمزور ویسٹ انڈیز کیخلاف ٹیسٹ سیریز جیتنے میں بھی ناکام رہا، جبکہ ورلڈکپ ٹیسٹ چیمپئن شپ میں پاکستان کو آخری نمبر ملا۔ اس کے علاوہ صرف ایک سال میں پاکستان کو بنگلہ دیش کے ہاتھوں ٹیسٹ سیریز میں وائٹ واش کا سامنا کرنے کے بعد ٹی ٹوئنٹی سیریز میں بھی شکست ہو گئی۔