جموں و کشمیر،لبریشن فرنٹ کی بھارتی ایجنسی کے یاسین ملک کے گھر پر چھاپے کی مذمت

بدھ 13 اگست 2025 16:51

سرینگر (اُردو پوائنٹ اخبارتازہ ترین - اے پی پی۔ 13 اگست2025ء) بھارت کے غیر قانونی زیر تسلط جموں و کشمیر میں لبریشن فرنٹ نے پارٹی چیئرمین محمد یاسین ملک کے گھر پر سٹیٹ انویسٹی گیشن ایجنسی کے چھاپے اور ان کی معمر والدہ اور بہن کو ہراساں کرنے کی شدید مذمت کی ہے، محمد یاسین ملک نئی دہلی کی بدنام زمانہ تہاڑ جیل میں غیر قانونی طور پر نظر بند ہیں۔

کشمیر میڈیا سروس کے مطابق لبریشن فرنٹ نے سرینگر میں جاری ایک بیان میں کہا کہ بھارت نے ایس آئی اے کو آزادی کے حامی رہنمائو ں کو نشانہ بنانے کے لیے کئی دہائیوں پرانے فرضی مقدمات دوبارہ کھولنے کا کام سونپا ہے، یاسین ملک کو سیاسی انتقام کا نشانہ بنایا جا رہا ہے ۔ تنظیم نے یاسین ملک کے خلاف مودی حکومت کی ایما پر دہلی ہائیکورٹ کے اقدامات کو مسترد کر تے ہوئے مقبوضہ علاقے میں بھارت کے غیر انسانی اور جارحانہ اقدامات کو بے نقاب کرنے کے لیے مقامی اور عالمی سطح پر اپنی مہم کو تیز کرنے کا عزم کیا۔

(جاری ہے)

بیان میں کہا گیا ہے کہ بھارت جبر کے ذریعے کشمیریوں کی جدوجہد آزادی کو دبانے پر تلا ہوا ہے لیکن وہ اپنے مذموم عزائم میں ناکام رہے گا۔ دریں اثنا، جموں و کشمیر ڈیموکریٹک فریڈم پارٹی (ڈی ایف پی) نے بھی یاسین ملک کے گھر اور دیگر حریت کارکنوں کی رہائش گاہوں پر ایس آئی اے کے چھاپوں کی مذمت کرتے ہوئے اسے ان کے اہل خانہ کو ہراساں کرنے کی دانستہ کوشش قرار دیا۔ ڈی ایف پی کے ترجمان ایڈووکیٹ ارشد اقبال نے کہا کہ بھارت اپنی نام نہاد تفتیشی ایجنسیوں کو آزادی کی حامی قیادت کو ڈرانے اور ان کی تذلیل کرنے کے لیے استعمال کر رہا ہے۔