ایک کیس کی کتنی فیس لیتے ہیں سپیکر اورلطیف کھوسہ میں دلچسپ نوک جھوک

بدھ 13 اگست 2025 21:47

اسلام آباد(اُردو پوائنٹ اخبارتازہ ترین - این این آئی۔ 13 اگست2025ء)قومی اسمبلی اجلاس میں تحریک انصاف کے لطیف کھوسہ اور سپیکر قومی اسمبلی سردارایاز صادق میں دلچسپ نوک جھوک ہوئی۔ بدھ کوقومی اسمبلی کے اجلاس کے دوران لطیف کھوسہ نے ایوان میں سپریم کورٹ کی فیسوں میں اضافے کا معاملہ اٹھایا جس پر وزیر قانون اعظم نذیر تارڑ نے مسئلہ حل کرانے کی یقین دہانی کرائی۔

لطیف کھوسہ نے نکتہ اعتراض پر اظہار خیال کرتے ہوئے کہا کہ سپریم کورٹ میں داخل ہونے سے روکا گیا، پہلے ریویو ٹکٹ کی فیس5 ہزار مقرر تھی اب 50 ہزار کر دی گئی ہے، سپریم کورٹ میں ہر قسم کی اپیلوں کے ٹکٹوں کی فیس بڑھا کردی گئی ہے۔اس موقع پر اسپیکر ایاز صادق نے سوال کیاکہ آپ ایک کیس کی کتنی فیس لیتے ہیں جس پرلطیف کھوسہ نے کہا کہ مجھے حنیف عباسی کے خلاف کیس میں5 کروڑ کی پیشکش ہوئی تھی مگر میں نے سیاسی شخصیت کے خلاف کیس لینے سے انکار کردیا۔

(جاری ہے)

سپیکر نے لطیف کھوسہ سے کہا کہ آپ ایک کیس کا 5 کروڑ لیتے ہیں کبھی کوئی کھانا شانا بھی کھلاتے ہیں اس پر قانون دان نے جواب دیا کہ جب آپ کہیں گے کھلا دیں گے۔سپیکر نے ازراہ مزاح کہا کہ ممبران سے کہوں کہ آپ سے کھانا کھائیں، اجلاس کے بعد آپ سے ملوں گا آپ تو بہت پیسے لیتے ہیں۔اس موقع پر وزیر قانون اعظم نذیرتارڑ نے کہا کہ ادھر حنیف عباسی موجود ہیں جنہیں رات کے اندھیرے میں عمر قید کی سزا سنائی گئی تاہم عدالتوں نے بعد میں انہیں بری بھی کردیا۔