وفاقی وزیر اورنگزیب خان کھچی کی لوک ورثہ میں یومِ آزادی اور معرکۂ حق کی تقریب میں شرکت

جمعرات 14 اگست 2025 17:35

اسلام آباد (اُردو پوائنٹ اخبارتازہ ترین - اے پی پی۔ 14 اگست2025ء) وفاقی وزیر برائے قومی ورثہ و ثقافت اورنگزیب خان کھچی نے جمعرات کو لوک ورثہ میں یومِ آزادی اور معرکۂ حق کے موقع پر منعقدہ تقریب میں شرکت کی۔ اس موقع پر پارلیمانی سیکرٹری فرح ناز اکبر، سیکرٹری قومی ورثہ و ثقافت اسد رحمان گیلانی اور ایگزیکٹو ڈائریکٹر لوک ورثہ ڈاکٹر وقاص بھی موجود تھے۔

وزارت قومی ورثہ و ثقافت کے مطابق تقریب کا آغاز یومِ آزادی اور معرکۂ حق کی مناسبت سے کیک کاٹنے سے ہوا۔ وفاقی وزیر نے اس موقع پر کہا کہ یومِ آزادی ہمیں نہ صرف آزادی کی قدر اور اس کے لیے دی جانے والی قربانیوں کی یاد دلاتا ہے بلکہ یہ اس عزم کی تجدید کا دن ہے کہ ہم اپنی ثقافت، تہذیب اور قومی ورثے کی حفاظت ہر حال میں کریں گے۔

(جاری ہے)

انہوں نے کہا کہ پاکستان-بھارت حالیہ کشیدگی نے ایک بار پھر ہمیں آزادی کی قیمت اور اس کے تحفظ کیلئے قومی یکجہتی کی ضرورت یاد دلا دی ہے۔

ان کا کہنا تھا کہ آزادی کا تحفظ قربانی اور اتحاد کے بغیر ممکن نہیں، اور دفاعِ وطن کیلئے پوری قوم سیسہ پلائی دیوار کی مانند ہے۔وفاقی وزیر نے لوک ورثہ میں معرکۂ حق سے منسوب تصویری نمائش اور ثقافتی پروگرامز کا بھی دورہ کیا اور ان کا سراہا۔ انہوں نے کہا کہ ہماری ثقافت ہزاروں سال پر محیط تاریخ رکھتی ہے اور یہ ہماری شناخت کا بنیادی حصہ ہے۔تقریب میں شریک شرکاء نے وطنِ عزیز کی آزادی، قومی یکجہتی اور شہداء کی قربانیوں کو خراجِ تحسین پیش کیا اور دشمن کے عزائم ناکام بنانے کے عزم کا اظہار کیا۔