یومِ آزادی، اجداد کی لازوال قربانیوں کو یاد کرنے اور شکر بجا لانے کا دن ہے، صوبائی وزرا صحت

جمعرات 14 اگست 2025 17:10

لاہور (اُردو پوائنٹ اخبارتازہ ترین - اے پی پی۔ 14 اگست2025ء) صوبائی وزرا صحت خواجہ سلمان رفیق اور خواجہ عمران نذیر نے فاطمہ جناح میڈیکل یونیورسٹی میں یوم آزادی کے سلسلہ میں منعقدہ تقریب میں بطور مہمان خصوصی شرکت کی۔اس موقع پر وائس چانسلر پروفیسر خالد مسعود گوندل، پرنسپل، پروفیسر عائشہ ملک، پروفیسر منیزہ اقبال، پروفیسر بلقیس شبیر، ایم ایس گنگارام ہسپتال ڈاکٹر عارف افتخار، پروفیسر ندیم و دیگر فیکلٹی ممبران سمیت طلبا و طالبات کی کثیر تعداد نے شرکت کی۔

صوبائی وزرا صحت نے اس موقع پر پرچم کشائی بھی کی اور صوبائی وزرا صحت نے اس موقع پر جشن آزادی کا کیک بھی کاٹا۔صوبائی وزیر صحت نے اظہار خیال کرتے ہوئے کہاکہ آج پوری قوم جشن آزادی اور معرکہ حق منا رہی ہے،آزادی رب العزت کی ایک انمول نعمت ہے جس کی قدر کرنی چاہئے،ہم نے پاکستان لاکھوں قربانیوں کے بعد حاصل کیا ہے،جشن آزادی کے موقع پر سرحدوں پر فرائض سر انجام دینے والے جوانوں کو خراج تحسین پیش کرتے ہیں ۔

(جاری ہے)

انہوں نے کہاکہ وزیر اعلیٰ پنجاب مریم نواز کے ویژن کے مطابق عوام تک صحت کی بہترین سہولیات کی فراہمی کیلئے کوشاں ہیں ۔ خواجہ عمران نذیر نے اظہار خیال کرتے ہوئے کہاکہ 78واں یومِ آزادی، اجداد کی لازوال قربانیوں کو یاد کرنے اور شکر بجا لانے کا دن ہے۔14 اگست تجدید عہد کا دن کہ پاکستان کو ترقی کی راہ پر گامزن رکھنے کیلئے اپنی تمام تر صلاحیتیں بروئے کار لائیں گے۔ انہوں نے کہا کہ عوامی خدمت، قانون کی بالادستی اور معاشی استحکام ہمارا مشن ہے۔