ملک کے دیگر شہروں کی طرح سکھر میں 78ویں یومِ آزادی کے موقع پر تقریب کا انعقاد

سکھر(اُردو پوائنٹ اخبارتازہ ترین - این این آئی۔ 14 اگست2025ء)ملک کے دیگر شہروں کی طرح سکھر میں 78ویں یومِ آزادی کے موقع پر مرکزی تقریب شایانِ شان اور قومی جوش و جذبے کے ساتھ منائی گئی۔ تقریب کے مہمانِ خصوصی ترجمان سندھ حکومت و میئر سکھر بیرسٹر ارسلان اسلام شیخ تھے۔ اس موقع پر کمشنر سکھر ڈویڑن عابد حسین قریشی، ڈی آئی جی فیصل عبداللہ چاچڑ، ڈپٹی کمشنر نادر شہزاد خان، ڈپٹی میئر ڈاکٹر ارشد مغل، میونسپل کمشنر علی رضا انصاری، معزز شہریوں، اساتذہ، صحافیوں سمیت مختلف شعبہ زندگی سے تعلق رکھنے والے افراد کی بڑی تعداد موجود تھی۔

تقریب کا آغاز تلاوتِ قرآنِ پاک سے ہوا، جس کے بعد ملٹری روڈ واکنگ ٹریک پر نصب دنیا کے 11ویں، ایشیا کے 7ویں، پاکستان کے دوسرے اور سندھ کے بلند ترین 300 فٹ فلیگ پول پر 84 فٹ لمبا اور 56 فٹ چوڑا سبز ہلالی پرچم لہرایا گیا۔

(جاری ہے)

پرچم کشائی کے ساتھ ہی قومی ترانہ بجایا گیا، جس کی گونج نے ماحول کو وطن سے محبت کے جذبات سے لبریز کر دیا۔ اس موقع پر پولیس، سول ڈیفنس کی جانب سے باوقار پریڈ پیش کی گئی۔

تقریب میں بچوں نے قومی یکجہتی اور آزادی کی جدوجہد کے موضوع پر رنگا رنگ ٹیبلوز پیش کیے، جبکہ ملی نغموں پر روایتی اور جدید رقص کی دلکش پیشکشوں نے حاضرین سے بھرپور داد حاصل کی۔ سامعین وقفے وقفے سے پاکستان زندہ باد کے نعروں سے فضا کو گرما رہے تھے۔ مہمانِ خصوصی بیرسٹر ارسلان اسلام شیخ و دیگر نے اپنے خطاب میں کہا کہ آج کا دن محض جشن منانے کا دن نہیں بلکہ اس عہد کی تجدید کا دن ہے کہ ہم اپنے اسلاف کی قربانیوں کو یاد رکھتے ہوئے وطن کی ترقی اور دفاع میں کوئی کسر نہیں چھوڑیں گے۔

انہوں نے کہا کہ آزادی ہمیں کسی تحفے میں نہیں ملی بلکہ یہ لاکھوں شہداء کے خون، مجاہدین کی انتھک جدوجہد اور مائوں بہنوں کی قربانیوں کا نتیجہ ہے، میئر نے اس عزم کا اظہار کیا کہ اجتماعی اتحاد، محنت اور مثبت سوچ کے ذریعے ہم پاکستان کو ترقی، خوشحالی اور وقار کی نئی بلندیوں تک لے جا سکتے ہیںان کا کہنا تھا کہ اللہ تعالیٰ نے انسان کو اشرف المخلوقات بنایا ہے اور اسے فرشتوں سے بھی برتر مقام عطا کیا ہے، لہٰذا ہمیں اپنی صلاحیتوں اور ذمہ داریوں کو پہچانتے ہوئے معاشرے کی بہتری میں فعال کردار ادا کرنا چاہیے، سکھر ہمارا مشترکہ گھر ہے اور اس کی خوبصورتی، صفائی اور ترقی ہم سب کی ذمہ داری ہے۔

انہوں نے شہریوں پر زور دیا کہ وہ شہر کو اپنی ملکیت سمجھتے ہوئے اسے اون کریں، اس کی حفاظت کریں اور بہتری کے ہر عمل میں شریک ہوں۔ میئر نے کہا کہ جب شہری اپنے شہر کے ساتھ تعلق اور فخر محسوس کرتے ہیں تو نہ صرف ماحول اور بنیادی سہولیات بہتر ہوتی ہیں بلکہ ترقی کے نئے مواقع بھی پیدا ہوتے ہیں۔ انہوں نے اس عزم کا اظہار کیا کہ بلدیہ اور عوام کے باہمی تعاون سے سکھر کو ایک مثالی اور ماڈل شہر بنایا جائے گا۔

میئر نے شہریوں سے اپیل کی کہ وہ اپنے فرائض دیانت، خدمت اور حب الوطنی کے جذبے کے ساتھ ادا کریں اور یہ مثبت سوچ آنے والی نسلوں تک منتقل کریں۔ انہوں نے بانی پاکستان قائداعظم محمد علی جناح، علامہ محمد اقبال اور تحریکِ آزادی کے شہداء کو خراجِ عقیدت بھی پیش کیا۔تقریب کے دوران میئر سکھر نے گورنمنٹ گرلز ہائی اسکول کی طالبہ فریحہ کریم چنہ، جنہوں نے میٹرک امتحانات میں فرسٹ ڈویڑن حاصل کی شاندار کارکردگی کے اعتراف میں انہیں لیپ ٹاپ اور انعام پیش کیا۔"بعد ازاں 78ویں جشنِ آزادی کے پرمسرت موقع پر سکھر کو سرسبز بنانے کے عزم کے ساتھ شجرکاری مہم کا آغاز کیا گیا۔