نیشنل ہائی ویز اینڈ موٹر وے پولیس کے زیر اہتمام یوم آزادی کی خصوصی تقریبات، ٹول پلازوں اور سروس ایریاز میں قومی ترانے اور ملی نغمے ، مسافروں میں جھنڈیاں تقسیم

جمعرات 14 اگست 2025 18:50

اسلام آباد (اُردو پوائنٹ اخبارتازہ ترین - اے پی پی۔ 14 اگست2025ء) نیشنل ہائی ویز اینڈ موٹر وے پولیس نے یوم آزادی کی خوشی میں خصوصی تقریبات کا انعقاد کیا اور وطن عزیز کا 78 واں یوم آزادی ملی جوش و جذبے کے ساتھ منایا ۔ ترجمان موٹر وے پولیس کے مطابق نیشنل ہائی ویز اینڈ موٹروے پولیس ہیڈکواٹرز اسلام آباد میں منعقدہ خصوصی تقریب کا آغاز آئی جی بی اے ناصر نے قومی پرچم کشائی کر کے کیا۔

اس موقع پر چاق و چوبند دستے نے قومی پرچم کو سلامی پیش کی۔ تقریب میں نیشنل ہائی ویز اینڈ موٹروے پولیس کے افسران، جوانوں، ملازمین اور بچوں نے شرکت کی۔ یوم آزادی کی مناسبت سے کیک بھی کاٹا گیا۔ آئی جی بی اے ناصر نے قوم اور پولیس افسران کو یوم آزادی کی مبارکباد دی اور وطن کی سلامتی اور ترقی کے لیے خصوصی دعا کی۔

(جاری ہے)

انہوں نے اپنے خطاب میں کہا کہ قائداعظم محمد علی جناح کی ولولہ انگیز قیادت میں پاکستان کی آزادی کا حصول ممکن ہوا۔

آزادی ایک عظیم نعمت ہے جس کی حفاظت ہم سب کی مشترکہ ذمہ داری ہے۔انہوں نے کہا کہ ہر فرد کو ملک کی بقاء، ترقی اور خوشحالی کے لیے انفرادی اور اجتماعی طور پر کردار ادا کرنا چاہیے۔ انہوں نے نیشنل ہائی ویز اینڈ موٹروے پولیس کے افسران کی قربانیوں اور بے لوث خدمت کو سراہا اور کہا کہ قومی شاہراہیں اور موٹرویز ملک کی معاشی شہ رگ ہیں، ان کی حفاظت کا مطلب ہے ملکی سلامتی، استحکام اور ترقی کو یقینی بنانا۔

آئی جی نے مزید کہا کہ نیشنل ہائی ویز اینڈ موٹروے پولیس قائداعظم محمد علی جناحؒ کے اصولوں کے مطابق دیانت داری، غیر جانبداری اور عوامی خدمت کے جذبے سے کام کرتی ہے اور ملک کی شاہراہوں اور مسافروں کی حفاظت کے لیے ہمہ وقت تیار ہے۔ یوم آزادی کے اس موقع پر، ہیڈکواٹرز سمیت تمام زونز، سیکٹرز اور بیٹس کے دفاتر کو برقی قمقوں سے سجایا گیا اور سبز ہلالی پرچم لہرایا گیا۔ تمام ٹول پلازوں اور سروس ایریاز میں ایل ای ڈی پر قومی ترانے اور ملی نغمے پیش کئے گئے، اور مسافروں میں سبز جھنڈیاں، جشن آزادی کے حوالے سے پمفلٹس اور گفٹ تقسیم کیے گئے۔ تقریب کے اختتام پر آئی جی نے بچوں میں خصوصی تحائف تقسیم کیے۔