وزیرداخلہ سے امریکی کوآرڈینیٹر برائے انسداد دہشتگردی گریگوری لوگرفوکی ملاقات،یوم آزادی کی مبارکباد

جمعہ 15 اگست 2025 17:39

اسلام آباد (اُردو پوائنٹ اخبارتازہ ترین - این این آئی۔ 15 اگست2025ء)وفاقی وزیر داخلہ محسن نقوی سے امریکی کوآرڈینیٹر برائے انسداد دہشتگردی گریگوری لوگرفو نے ملاقات کی جس میں انہوں نے یوم آزادی کی مبارکباد دی جبکہ ملاقات میں پاک امریکہ تعلقات۔ انسداد دہشتگردی، بارڈر سیکورٹی، انسداد منشیات سمیت مختلف شعبوں میں تعاون بڑھانے پر اتفاق کیا گیا ۔

محسن نقوی نے کہاکہ صدر ڈونلڈ ٹرمپ کی حکومت آنے کے بعد پاک امریکہ تعلقات میں غیر معمولی بہتری آئی ہے،صدر ٹرمپ کی عالمی امن کیلئے مخلصانہ کاوشیں قابل تحسین ہے۔ انہوںنے کہاکہ پاک امریکہ تعلقات میں شفافیت۔باہمی اعتماد اور تعاون کا عنصر نمایاں ہے،بہترین موقع ہے کہ باہمی تعلقات کو ہر شعبے میں فروغ دیا جائے۔

(جاری ہے)

انہوں نے کہا کہ انسداد دہشت گردی ڈائیلاگ سے مشترکہ لائحہ عمل بنانے میں مدد ملے گی۔

انہوں نے کہاکہ امریکہ کی جانب سے کالعدم بی ایل اے اور کالعدم مجید بریگیڈ کو عالمی دہشت گرد تنظیمیں قرار دینا احسن اقدام ہے،دہشتگردی کے خاتمے کے لیے پاک امریکہ تعاون کے مثبت نتائج سامنے آئیں گے۔ گریگوری لوگرفو نے کہا کہ پاکستان جیو سٹریٹجک اعتبار سے انتہائی اہم ملک ہے۔امریکی کوآرڈینیٹر برائے انسداد دہشتگردی گریگوری لوگرفو نے دہشت گرد حملوں میں جانی نقصان پر افسوس کا اظہار کیا۔