وزیراعظم نے این ڈی ایم اے کو آزاد کشمیر اور خیبر پختونخوا میں سیلاب اور بارشوں سے متاثرہ علاقوں میں امدادی کارروائیاں تیز کرنے کی ہدایت کی ہے، حکومت کا فوکس ریلیف اور ریسکیو اقدامات پر ہے، عطاء اللہ تارڑ

جمعہ 15 اگست 2025 18:47

اسلام آباد (اُردو پوائنٹ اخبارتازہ ترین - اے پی پی۔ 15 اگست2025ء) وفاقی وزیر اطلاعات و نشریات عطاء اللہ تارڑ نے کہا ہے کہ وزیراعظم محمد شہباز شریف نے نیشنل ڈیزاسٹر مینجمنٹ اتھارٹی (این ڈی ایم اے) کو آزاد جموں و کشمیر اور خیبر پختونخوا میں سیلاب اور بارشوں سے متاثرہ علاقوں میں بھرپور امدادی کارروائیاں کرنے کی ہدایت کی ہے، حکومت کا فوکس ریلیف اور ریسکیو اقدامات پر ہے، خیبر پختونخوا میں جاری ریسکیو اور ریلیف آپریشن میں تمام ادارے وسائل بروئے کار لا رہے ہیں۔

جمعہ کو اپنے بیان میں وفاقی وزیر اطلاعات نے کہا کہ وزیراعظم شہباز شریف سیلابی صورتحال سے مکمل طور پر آگاہ ہیں اور امدادی کارروائیوں کے لئے ہدایات جاری کر رہے ہیں، وزیراعظم نے چیئرمین این ڈی ایم اے لیفٹیننٹ جنرل انعام حیدر کو خیبر پختونخوا اور آزاد کشمیر کی حکومتوں سے مسلسل رابطہ رکھنے اور امدادی سرگرمیوں کو تیز کرنے کی ہدایت کی ہے۔

(جاری ہے)

انہوں نے کہا کہ وزیراعظم ہائوس میں ایک خصوصی سیل بھی قائم کیا گیا ہے جو این ڈی ایم اے سے چوبیس گھنٹے رابطے میں ہے۔ عطاء اللہ تارڑ نے کہا کہ حالیہ بارشوں اور سیلابی صورتحال کے دوران وزیراعظم شہباز شریف نے تین مرتبہ این ڈی ایم اے کا دورہ کر کے ذاتی طور پر ریسکیو و ریلیف اقدامات کا جائزہ لیا۔ انہوں نے کہا کہ حکومت کا فوکس ریلیف اور ریسکیو اقدامات پر ہے، خیبر پختونخوا میں جاری ریسکیو اور ریلیف آپریشن میں تمام ادارے وسائل بروئے کار لا رہے ہیں۔

انہوں نے کہا کہ خیبر پختونخوا میں چالیس کے قریب افراد کے لاپتہ ہونے کی اطلاعات ہیں۔ انہوں نے کہا کہ انسانی جانوں کو محفوظ بنانے کے لئے اقدامات اٹھائے جا رہے ہیں۔ وفاقی وزیر نے کہا کہ این ڈی ایم اے کے پیشگی آگاہی نظام سے خیبر پختونخوا سمیت تمام صوبائی حکومتوں کو باقاعدگی سے آگاہی فراہم کی جا رہی ہے، این ڈی ایم اے کا کمانڈ اینڈ کنٹرول سینٹر چوبیس گھنٹے فعال ہے اور صورتحال پر کڑی نظر رکھے ہوئے ہے۔

Facebook Twitter Google + Share on Whatsapp

متعلقہ عنوان :

مزید اہم خبریں