14 اگست صرف خوشی اور جشن کا دن نہیں بلکہ یہ قربانی، ایثار اور یکجہتی کا پیغام ہے ، ڈپٹی کمشنر پشین

کوئٹہ (اُردو پوائنٹ اخبارتازہ ترین - اے پی پی۔ 15 اگست2025ء) ڈپٹی کمشنر پشین منصور احمد نے کہا ہے کہ 14 اگست صرف خوشی اور جشن کا دن نہیں بلکہ یہ قربانی، ایثار اور یکجہتی کا پیغام ہے۔ قائداعظم محمد علی جناح اور علامہ محمد اقبال کے خواب اور قیادت کی بدولت ہمیں ایک آزاد مملکت کا قیمتی تحفہ ملا، جس کی بنیاد ایمان، اتحاد اور قربانی پر رکھی گئی۔

وہ یومِ آزادی کی مرکزی تقریب سے خطاب کر رہے تھے جو پشین کے ریسٹ ہاؤس میں نہایت تزک و احتشام سے منعقد ہوئی۔تقریب کا آغاز پرچم کشائی سے ہوا، جس کی قیادت ڈپٹی کمشنر منصور احمد اور اراکین اسمبلی نے کی جبکہ پولیس کے چاق و چوبند دستے نے پرچم کو سلامی پیش کی۔ اس موقع پر پورا ڈی سی ریسٹ ہاؤس سبز ہلالی پرچموں، برقی قمقموں اور ملی نعروں سے گونج رہا تھا۔

(جاری ہے)

تقریب میں ایس پی پولیس حلیم اچکزئی، اراکین صوبائی اسمبلی، ضلعی افسران، معزز شہری اور مختلف شعبہ ہائے زندگی سے تعلق رکھنے والے افراد کے علاوہ طلباء و طالبات کی بڑی تعداد نے شرکت کی۔ڈپٹی کمشنر منصور احمد نے کہا کہ آزادی ہمیں ہمارے دین، ثقافت اور شناخت کے مطابق زندگی گزارنے کا حق دیتی ہے اور یہ حق لاکھوں شہداء کے خون کی بدولت ملا۔

افواجِ پاکستان اور تمام سکیورٹی فورسز نے ہر دور میں مادرِ وطن کے تحفظ کے لیے جان کی بازی لگائی۔افواج پاکستان،بلوچستان لیویز فورس، پولیس اور دیگر اداروں کی قربانیاں ہماری تاریخ کا روشن باب ہیں، جنہیں کبھی فراموش نہیں کیا جا سکتا۔انہوں نے کہا کہ یومِ آزادی ہمیں یاد دلاتا ہے کہ یہ ملک بڑی قربانیوں اور طویل جدوجہد کے بعد حاصل ہوا۔

آزادی کا یہ چراغ روشن رکھنے کے لیے ہمیں اتحاد، قربانی اور محنت کی راہ پر گامزن رہنا ہوگا۔ قومیں وہی ترقی کرتی ہیں جو اپنی آزادی کی قدر پہچانتی ہیں اور اس کے استحکام کے لیے متحد ہو کر کام کرتی ہیں۔ طلباء و طالبات نے وطن سے محبت کے جذبے سے سرشار تقاریر، ملی نغمے اور خوبصورت ٹیبلوز پیش کیے، جن میں قیامِ پاکستان کی جدوجہد، برصغیر کے مسلمانوں کی قربانیاں اور دفاعِ وطن کا جذبہ بھرپور انداز میں دکھایا گیا۔