وزیراعظم شہباز شریف کی متاثرہ علاقوں میں ریسکیو آپریشن کو مزید تیز کرنے کی ہدایت

ہفتہ 16 اگست 2025 21:10

اسلام آباد (اُردو پوائنٹ اخبارتازہ ترین - اے پی پی۔ 16 اگست2025ء) وزیراعظم محمد شہباز شریف نے بارشوں اور سیلاب سے متاثرہ علاقوں میں ریسکیو آپریشن کو مزید تیز کرنے کی ہدایت کرتے ہوئے کہا ہے کہ سیلاب متاثرین کو خیموں، ادویات، فوری طبی امداد اور تمام متعلقہ سہولیات کی ترجیحی بنیادوں پر فراہمی یقینی بنائی جائے، نیشنل ڈیزاسٹر مینجمنٹ اتھارٹی ، صوبائی ڈیزاسٹر مینجمنٹ اتھارٹیز اور آزاد جموں و کشمیر و گلگت بلتستان کے ڈیزاسٹر مینجمنٹ کے اداروں سے رابطے مزید مربوط اور انکی ہر قسم کی معاونت کرے ۔

ہفتہ کو وزیر اعظم آفس کے میڈیا ونگ سے جاری بیان کے مطابق وزیر اعظم ملک کے بالائی علاقوں میں شدید بارشوں اور سیلابی صورتحال سے متاثرین کے ریسیکیو و ریلیف آپریشن کی خود نگرانی کررہے ہیں۔

(جاری ہے)

وزیرِ اعظم نے متاثرہ اضلاع میں امدادی سامان کی ترسیل، لوگوں کو محفوظ مقامات تک پہنچانے اور لاپتہ افراد کیلئے سرچ آپریشن کو تیز و مؤثر بنانے کیلئے چیئرمین این ڈی ایم اے سے مسلسل رابطہ قائم رکھا۔

وفاقی وزیر کشمیر و گلگت بلتستان نے وزیراعظم کی خصوصی ہدایت پر پورا دن کے پی کے میں سیلاب متاثرہ علاقوں کا دورہ کیا اور امدادی سامان کی ترسیل کی خود نگرانی کی۔وزیراعظم نے متاثرہ علاقوں میں ریسکیو آپریشن کو مزید تیز کرنے کی ہدایت کی۔وزیراعظم نے سیلاب متاثرین کو خیموں، ادویات، فوری طبی امداد اور تمام متعلقہ سہولیات ترجیحی بنیادوں پر فراہم کرنے کی ہدایت کی۔

وزیرِ اعظم نے متاثرہ و ملحقہ علاقوں کے مکینوں کو موسم کی پیشگی اطلاعات پہنچانے اور ممکنہ کسی بھی ہنگامی صورتحال کیلئے این ڈی ایم اے کو تیار رہنے کی ہدایت کی۔وزیراعظم نے نیشنل ڈیزاسٹر مینجمنٹ اتھارٹی کو صوبائی ڈیزاسٹر مینجمنٹ اتھارٹیز اور آزاد جموں و کشمیر و گلگت بلتستان کے ڈیزاسٹر مینجمنٹ کے اداروں سے رابطے مزید مربوط اور انکی ہر قسم کی معاونت کی ہدایت کی۔وزیراعظم نے بارشوں اور لینڈ سلائیڈنگ کے باعث بند راستوں کو فوری بحال کرنے کے لئے کارروائی تیز کرنے اور بند شاہراہوں پر پھنسے مسافروں کو جلد از جلد مدد پہنچانے کی ہدایت کی۔