منہاج القرآن لاہور نے استقبال ربیع الاول مشعل بردار جلوسوں کا شیڈول جاری کر دیا

لاہور (اُردو پوائنٹ اخبارتازہ ترین - اے پی پی۔ 17 اگست2025ء) تحریک منہاج القرآن لاہور کااجلاس اتوار کے روز یہاں مرکزی سیکرٹریٹ میں صدر لاہور اقبال حسین باجوہ کی صدارت میں منعقد ہوا جس میں استقبال ربیع الاول کے سلسلے میں مشعل بردار جلوسوں کے شیڈول اور روٹس کو حتمی شکل دی گئی۔ترجمان کے مطابق اجلاس میں فیصلہ کیا گیا کہ لاہور کے تمام ٹائونز اور یونین کونسلز میں 100سے زائد مقامات سے استقبال ربیع الاول کے سلسلے میں مشعل بردار جلوس نکالے جائیں گے، ان جلوسوں میں تحریک منہاج القرآن، منہاج القرآن علماء کونسل، منہاج یوتھ لیگ، مصطفوی سٹوڈنٹس موومنٹ، پاکستان عوامی تحریک اور دیگر فورمز کے مرکزی، صوبائی و ضلعی رہنما اور کارکنان شرکت کریں گے۔

اجلاس میں یہ بھی فیصلہ کیا گیا کہ مشعل بردار جلوسوں میں عوام ، تاجربرادری، مزدور، کسان، وکلا، طلبہ، سیاسی، سماجی اور مذہبی رہنمائوں کو بھی شرکت کی دعوت دی جائے گی۔

(جاری ہے)

اجلاس میں ناظم منہاج القرآن لاہور ناظم علی رحمت، کیپٹن (ر) عبدالمجید،علامہ شاہد اقبال یوسفی، ممتازخان کچھی، حاجی خالد محمود، علامہ احسن اویس،اشرف بھٹی، معین احمد صدیقی دیگر رہنمائوں نے شرکت کی۔

اجلاس میں بتایا گیاکہ 23 اگست کو نشاط کالونی لاہور،25اگست کومغل پورہ چوک سے شالیمار چوک،26 اگست کو مناواں سے جلو موڑ،27 اگست کومسجد نقش لاثانی سے چوک سید شالا مار،30اگست کو شیر شاہ روڈ سے چاہ میراں بازار اور31اگست کو داروغہ والا کے علاوہ گرو مانگٹ گلبرگ،جلو موڑ چوک، آخری منٹ سٹاپ،صدر کینٹ، بھٹہ چوک، گلشن راوی، شاہدرہ، بادامی باغ، رائے ونڈ، ٹائون شپ، چوہنگ، مانگا منڈی، گرین ٹائون، چونگی امر سدھو، والٹن روڈ، کاہنہ، چوک یتیم خانہ، سمن آباد و دیگر علاقوں سے عظیم الشان مشعل بردار جلوس نکالے جائیں گے جن کی قیادت تحریک منہاج القرآن کے مرکزی رہنما کریں گے۔

اسی طرح ملتان روڈ، سمن آباد، شاہدرہ، ماڈل ٹائون، امامیہ کالونی اور اقبال ٹائون سے بھی مشعل بردار جلوس نکالے جائیں گے اور محافل میلاد النبی ﷺکا اہتمام کیا جائے گا۔اجلاس سے خطاب کرتے ہوئے اقبال حسین باجوہ نے کہا کہ منہاج القرآن لاہور کے زیراہتمام مشعل بردار جلوس نکالے جائیں گے اور ضیافت میلاد کا اہتمام بھی کیا جائے گا۔ انہوں نے کہا کہ مینار پاکستان پر 42ویں عالمی میلاد کانفرنس کی تیاریاں بھی شروع کر دی گئی ہیں جس میں لاکھوں لو گ شرکت کریں گے۔