ذ*جمعیت اہلحدیث کا متاثرہ علاقوں میں امدادی سرگرمیاں جاری رکھنے کا اعلان

ًخیبرپختونخواہ میں سیلابی صورتحال پر سیاسی پوائنٹ سکورننگ نہ کی جائے ، سینیٹر ڈاکٹر حافظ عبدالکریم

اتوار 17 اگست 2025 20:30

C لاہور (اُردو پوائنٹ اخبارتازہ ترین - آن لائن۔ 17 اگست2025ء) مرکزی جمعیت اہلحدیث پاکستان کی مرکزی مجلس عاملہ کا اہم اجلاس امیر مرکزی جمعیت اہلحدیث پاکستان سینیٹر ڈاکٹر حافظ عبدالکریم کی صدارت میں منعقد ہوا، جس میں چاروں صوبوں، گلگت بلتستان اور آزاد کشمیر سمیت ملک بھر سے اراکین اور رہنماؤں نے شرکت کی۔اجلاس میں تنظیم کو مزید فعال اور موثر بنانے کے لیے اہم فیصلے کیے گئے۔

اس موقع پر رکنیت سازی کے آغاز کی منظوری دی گئی جبکہ فیصلہ کیا گیا کہ ڈویڑنل اور صوبائی سطح پر جلسہ عام منعقد کیے جائیں گے تاکہ عوامی رابطہ مہم کو تیز اور مؤثر بنایا جا سکے۔مجلس عاملہ کے اجلاس میں خیبرپختونخوا میں حالیہ تباہی پر گہرے افسوس کا اظہار کیا گیا اور متاثرہ علاقوں میں امدادی سرگرمیاں جاری رکھنے کا اعلان کیا گیا۔

(جاری ہے)

اجلاس میں اس عزم کا اعادہ کیا گیا کہ مرکزی جمعیت اہلحدیث ہر مشکل گھڑی میں عوام کے ساتھ کھڑی ہے اور ریلیف کی سرگرمیوں کو مزید بڑھایا جائے گا۔

اجلاس میں مرکزی قیادت نے کارکنوں کے جذبے اور قربانیوں کو سراہتے ہوئے کہا کہ تنظیمی ڈھانچے کو مزید مضبوط بنانے کے لیے اجتماعی کوششوں کی ضرورت ہے۔ اجلاس میں ملکی سیاسی اور سماجی صورتحال پر بھی تفصیلی تبادلہ خیال کیا گیا۔ اجلاس کے بعد میڈیا سے گفتگو کرتے ہوئے امیر مرکزی جمعیت اہلحدیث ڈاکٹرحافظ عبدالکریم نے کہا کہ ہماری سیاست کا مقصد ذاتی مفاد نہیں بلکہ عوامی خدمت ہے۔

خیبرپختونخواہ میں سیلابی صورتحال پر سیاسی پوائنٹ سکورننگ کی بجائے مسائل سے دوچار ، مجبور اور لاچار عوام کو بلاتفریق امدادی سامان فراہم کرنے کیلیے تمام جماعتیں اپنا اپنا کردار ادا کریں۔ انہوں نے کہا کہ دینی و سیاسی قیادت کو ملک کو بحرانوں سے نکالنے کے لیے متحد ہونا ہوگا جبکہ ملک کی ترقی صرف جمہوری استحکام اور آئینی بالادستی میں مضمر ہے۔ اجلاس میں مولانا عبدالرشیدحجازی ،مولانا علی محمد ابوتراب ،علامہ معتصم الہی ظہیر ،فیصل افضل شیخ ،حافظ عبدالغفار ،حافظ یونس آزاد ،قاری صہیب احمد میر محمدی ،قاری حنیف ربانی ودیگر اراکین نے شرکت کی۔