غیریقینی موسمیاتی صورتحال سے ہونے والے نقصان سے بچنے کیلئے ٹھوس منصوبہ بندی کرنا ہو گی‘ خادم حسین

پیر 18 اگست 2025 13:19

لاہور(اُردو پوائنٹ اخبارتازہ ترین - این این آئی۔ 18 اگست2025ء)فائونڈر ز گروپ کے سرگرم رکن ،پاکستان سٹون ڈویلپمنٹ کمپنی کے بورڈ آف ڈائریکٹر کے رکن ، سینئر نائب صدر فیروز پور روڈ بورڈاورسابق ممبر لاہور چیمبر آف کامرس خادم حسین نے خیبر پختوانخواہ، آزاد کشمیر اور گلگت بلتستان میں بارشوں، بادل پھٹنے اور سیلاب سے ہونے والی تباہی پر انتہائی افسوس کا اظہار کرتے ہوئے کہا ہے کہ پاکستان کو مستقبل میں وسیع پیمانے پر جانی و مالی نقصانات سے بچنے کیلئے موثر اور ٹھوس حکمت عملی مرتب کرنا ہو گی ۔

(جاری ہے)

اپنے بیان میں انہوںنے کہا کہ ایک عالمی ادارے کی رپورٹ کے مطابق 2025 کی پہلی ششماہی میں دنیا بھر میں 135 ارب ڈالر کے معاشی نقصانات ریکارڈ ہوئے جو اس حقیقت کو اجاگر کرتے ہیں کہ موسمیاتی غیر یقینی صورتحال اب ادارہ جاتی تیاری سے کہیں زیادہ تیز رفتاری سے بڑھ رہی ہے۔ انہوںنے کہا کہ پاکستان جیسے ترقی پذیر ملک کو ا ن حالات سے نمٹنے کے لئے غیر معمولی اقدامات اٹھانا ہوں گے اور وسائل کا رخ اس طرف موڑنا ہوگا ۔ انہوں نے کہا کہ دنیا کو بتانا ہوگا کہ پاکستان کلائمیٹ چینچ سے سب سے زیادہ متاثر ہونے والے ملک ہے ،عالمی ادارے اور ایجنسیاں اس تناظر میں اعلان کردہ فنڈز فوری جاری کریں تاکہ پاکستان اس حوالے سے عملی پیشرفت کر سکے۔