بارشوں اور فلیش فلڈ کے باعث خیبرپختونخوا میں ہونے والے جانی و مالی نقصانات کی رپورٹ جاری

لاہور(اُردو پوائنٹ اخبارتازہ ترین - این این آئی۔ 18 اگست2025ء)پی ڈی ایم اے نے بارشوں اور فلیش فلڈ کے باعث صوبہ کے مختلف اضلاع میں اب تک ہونے والے جانی و مالی نقصانات کی رپورٹ جاری کردی۔پی ڈی ایم اے نے کہا کہ صوبہ میں ہونے والی بارشوں اور فلش فلڈ کے باعث مختلف حادثات میں اب تک 325 افراد جاں بحق اور 156افراد زخمی ہوئے، جاں بحق افراد میں 274 مرد، 30 خواتین اور 21 بچے شامل جبکہ زخمیوں میں 123 مرد، 23 خواتین اور 10 بچے شامل ہے۔

پی ڈی ایم اے نے کہا کہ بارشوں اور فلیش فلڈ کے باعث اب تک کی رپورٹ کے مطابق مجموعی طور پر 336 گھر وں کو نقصان پہنچا جس میں 233 گھروں کو جزوی اور 106 گھر مکمل منہدم ہوئے۔بیان کے مطابق سیلاب سے زیادہ متاثرہ ضلع بونیر میں اب تک مجموعی طور پر 217 افراد جابحق ہوئے، یہ حادثات صوبہ کے مختلف اضلاع سوات، بونیر، باجوڑ، مانسہرہ، شانگلہ, دیر لویر اور بٹگرام میں پیش آئے۔

(جاری ہے)

17 سے 19اگست کے دوران شدید بارشوں کا امکان ظاہر کیا گیا ہے جبکہ بارشوں کا موجودہ سلسلہ 21 اگست تک وقفے وقفے سے جاری رہنے کا امکان ہے۔پی ڈی ایم اے نے کہا کہ وزیر اعلی خیبر پختونخوا کی خصوصی ہدایت پر متاثرہ اضلاع کو 89 ٹرکوں پر مشتمل امدادی سامان کی فراہمی مکمل ہوگئی، امدادی سامان میں ٹنٹس، میٹریسس، بسترے، کچن سیٹس،ترپال، چٹائیاں،مچھر دانیاں، جنریٹرز اور دیگر روزمرہ زندگی کی اشیاء شام ہیں۔

صوبائی حکومت کی ہدایت پر پی ڈی ایم اے کی جانب سے متاثرہ اضلاع کی ضلعی انتظامیہ امدادی فنڈ کی مد میں 800 ملین روپے جاری کردیے گئے، صوبہ کے سب سے زیادہ متاثرہ ضلع بونیر کی انتظامیہ کو بھی 500 ملین روپے امدادی فنڈ جاری ہے۔متاثرہ اضلاع کی انتظامیہ کو امدادی سرگرمیاں تیز کرنے اور متاثرین کو فوری معاونت فراہم کرنے کی ہدایت کی گئی۔پی ڈی ایم اے نے کہا کہ ایمرجنسی آپریشن سنٹر مکمل طور پر فعال ہے۔

عوام کسی بھی نا خوشگوار واقعے کی اطلاع، موسمی صورتحال سے آگائی اور معلومات کے لیے فری ہیلپ لائن 1700 پر رابطہ کریں۔ دوسری جانب ضلع نوشہرہ میں طوفانی بارش سے کمرے کی چھت گرگئی جس کے نتیجے میں میاں، بیوی جاں بحق ہوگئے۔ریسکیو 1122 نوشہرہ کے مطابق چھت گرنے کا واقعہ تحصیل پبی میں چوکی ممریز کے مقام پر پیش آیا۔ریسکیو حکام کے مطابق جاں بحق ہونے والوں میں 29 سالہ اسد عمر اور ان کی 24 سال زوجہ شامل ہیں۔