ایس آئی ایف سی کی معاونت سےپاکستان میں ڈیجیٹل ترقی کے نئے دور کے آغاز سے ڈیجیٹل انفراسٹرکچر اور براڈبینڈ فراہمی کو بڑھانےکے عزم کو تقویت ملے گی

پیر 18 اگست 2025 16:48

اسلام آباد (اُردو پوائنٹ اخبارتازہ ترین - اے پی پی۔ 18 اگست2025ء) خصوصی سرمایہ کاری سہولت کونسل (ایس آئی ایف سی) کی معاونت سےپاکستان میں ڈیجیٹل ترقی کے نئے دور کے آغاز سے ڈیجیٹل انفراسٹرکچر اور براڈبینڈ فراہمی کو بڑھانےکے عزم کو تقویت ملے گی۔جنوبی ایشیا میں سب سے تیز رفتار اضافے کے ساتھ پاکستان میں براڈبینڈ صارفین کی تعداد 1.3 کروڑ سے تجاوز کر گئی ہے،حکومت براڈبینڈ صارفین کے لیے ڈیجیٹل انفراسٹرکچر کی ترقی کے لیے مؤثر اقدامات کر رہی ہے ۔

اس حوالے سے کیپیٹل ڈویلپمنٹ اتھارٹی نے اسلام آباد میں آئی ٹی اور فائبر آپٹک انفراسٹرکچر کی تنصیب کے لیے ’’ رائٹ آف وے‘‘ چارجز ختم کر دیئے ہیں جوسرکاری زمین پر انفراسٹرکچر کی تنصیب کے لیے فیس کی مد میں وصول کئے جاتے تھے۔

(جاری ہے)

وفاقی وزیر برائے آئی ٹی اور ٹیلی کام شزہ فاطمہ خواجہ نے اس اقدام کو آئی ٹی و ٹیلی کام شعبے کے لیےگیم چینجر قرار دیا ہے،چارجز کے خاتمے سے سستا اور قابل اعتماد انٹرنیٹ، نجی سرمایہ کاری اور ڈیجیٹل رسائی میں اضافہ متوقع ہے اورٹیلی کام اور انٹرنیٹ کمپنیز کے لیے لاگت کم ہونے سے سرمایہ کاری کے مواقع میں بھی اضافہ ہوگا۔

اس اقدام سے ڈیجیٹلائزیشن اور شہریوں کے لیے بہتر مواصلاتی رسائی کو فروغ ملے گا،وفاقی دارالحکومت اسلام آباد میں کامیاب نفاذ دیگر شہروں کو بھی چارجز ختم کرنے کی ترغیب دے گا۔ایس آئی ایف سی کی موثر کاوشوں سے براڈبینڈ او ر ڈیجیٹل انفراسٹرکچر ترقی کی راہ پر گامزن ہے۔