مودی حکومت کا جنگی جنون خطے کے امن کے لئے سنگین خطرہ

مودی حکومت کی یہ کوشش درحقیقت اپنی فوجی ناکامیوں پر پردہ ڈالنے اور ہندو انتہاپسندی کو ہوا دینے کی ایک اور سازش ہے

پیر 18 اگست 2025 16:51

نئی دہلی(اُردو پوائنٹ اخبارتازہ ترین - این این آئی۔ 18 اگست2025ء) بھارتی وزیراعظم نریندر مودی کی حکومت نے’’ سدرشن چکر ‘‘کے نام سے ایک نئے فضائی دفاعی نظام کا اعلان کیا ہے جسے خطے میں امن کے لیے سنگین خطرہ قرار دیا جا رہا ہے۔کشمیرمیڈیا سروس کے مطابق ایک رپورٹ میں کہاگیا ہے کہ یہ نظام حملوں کو ناکام بنانے اور فوجی صلاحیت بڑھانے کے لیے تیار کیا جائے گا۔

مودی حکومت کی یہ کوشش درحقیقت اپنی فوجی ناکامیوں پر پردہ ڈالنے اور ہندو انتہاپسندی کو ہوا دینے کی ایک اور سازش ہے۔ وزیراعظم مودی نے کرشن کے مذہبی استعارے کو فوجی منصوبے سے جوڑ کر فوج کو ہندوتوا سیاست کا ہتھیار بنا دیا ہے۔ ان کا دعویٰ ہے کہ یہ مشن خودمختاری، تیز، درست اور موثر دفاعی ردعمل کی ضمانت ہوگا۔

(جاری ہے)

حقیقت یہ ہے کہ بھارتی فضائیہ پہلے ہی’’ کویری انجن‘‘ جیسی ناکامیوں کا سامنا کرچکی ہے جس پر 1989سے اب تک اربوں روپے ضائع ہوچکے ہیں۔

مودی حکومت کے نعروں اور حقیقت میں زمین و آسمان کا فرق ہے۔ مودی حکومت کی ناقص پالیسیوں نے نہ صرف بھارتی عوام کو بنیادی سہولتوں سے محروم کردیا ہے بلکہ خطے کو ایک نئے تصادم کے دہانے پر بھی کھڑا کردیا ہے۔ بھارت میں غربت، بھوک اور بے روزگاری کے باوجود مودی حکومت اسلحہ کی دوڑ میں مصروف ہے، جبکہ آپریشن سندور جیسی ناکامیوں نے بھارتی فوج کی رسوائی کو عیاں کر دیا ہے۔ ماہرین کے مطابق مودی حکومت کا یہ جنگی جنون نہ صرف بھارتی عوام کی محرومیوں کی اصل وجہ ہے بلکہ یہ پورے خطے کے عدم استحکام کا باعث بھی بن رہا ہے۔ اس طرح کے فوجی منصوبے درحقیقت عوامی مسائل سے توجہ ہٹانے اور ہندو انتہاپسندی کو فروغ دینے کی کوششیں ہیںجو خطے کے امن کے لیے سنگین خطرہ ہیں۔